Desant bıatlony boıynsha saıys qorytyndysy shyǵaryldy
ASTANA. QazAqparat - Desant bıatlony boıynsha saıys qorytyndysy shyǵaryldy, dep habarlaıdy QR QM baspasóz qyzmeti.
Birinshi orynǵa Qazaqstan Aeroutqyr áskerleri áskerı bólimderiniń úlgili parashıýttik-desanttyq (desanttyq-shabýyldaý) bólimsheleri talasty. Nátıjesinde 32363 áskerı bóliminiń komandasy jeńiske jetti.
«Bul doda Aeroutqyr áskerleri áskerı qyzmetshileriniń jaýyngerlik ázirligin taǵy bir márte kórsetti. Barlyqtaryńyz oqý jáne jaýyngerlik tapsyrmalardy oryndaýǵa ázirlikte ekendikterińizdi dáleldedińizder», - dep atap ótti QR QK QÁ Aeroutqyr áskerleriniń qolbasshysy general-maıor Dáýlet Ospanov.
Desant bıatlony shildeniń 20-y men 25-i aralyǵynda 35-shi desanttyq-shabýyldaý brıgadasynyń bazasynda ótkizildi. Alty kúndik jarys ishinde qatysýshylar birqatar synaqtardan ótti: desanttyq parashıýtterdi tóseý, baǵdarlaý jáne áskerı topografııa, áskerı-medıtsınalyq daıyndyq, AK-74-ten oq atý, «Atletızm. Tabandylyq. Alǵyrlyq» kedergiler jolaǵy, kásibı jaýyngerlik tapsyrma, túngi reıd pen júgirý normatıvterin tapsyrdy.
Saıys barysyn Úndistan Qarýly Kúshteriniń ókilderi qadaǵalady. Olar áskerı qyzmetshilerimizdiń teorııalyq jáne praktıkalyq daıyndyq deńgeıin joǵary baǵalady.
