Derjavınskide kıikterge músin ornatyldy
ASTANA. QazAqparat - Músinshi-gıperrealıst Aıdos Esmaǵambetov qyzyl kitapqa engen kıikterge arnap, músindik ınstallıatsııa jasady. Óziniń beınerolıginde sheber týyndyny ázirleý barysyn kórsetti, dep habarlaıdy QazAqparat tilshisi.
«Músindi bir aılyq demalysymda tapsyrys boıynsha ázirledim - kıikter Derjavınskini kóriktendirip turady. Óte berik ári uzaqqa shydamdy shynyplastık materıalyn qoldandym», - deıdi Aıdos Esmaǵambetov.
Torǵaı men Aqmola dalalarynda aqbókenderdiń Betpaqdala aqbókender popýlıatsııasynyń eń kóp bóligi tirshilik etedi. Dál osy dalada 2015 jyly 150 myńnan astam relıktik janýar qyrylyp qaldy. Meniń týyndymnyń da jasalýyna kıikterdiń joǵalyp ketý qaýpi yqpal etti», - deıdi Aıdos.
Músin kólemi shynaıy kıiktermen shamalas jáne músinshi janýarlar qozǵalysynyń ásemdigin barynsha berýge tyrysqan.
Qazirgi ýaqytta músinshi tanymal boksshy Gennadıı Golovkınniń músinin ázirleýde jáne bul jumysty GGG kelesi aıqasyna deıin bitirýdi josparlap otyr.
Eske sala ketsek, respýblıkada «Qazaqstannyń 100 jańa esimi» jobasy boıynsha daýys berý bastaldy. «Mádenıet» bólimindegi úmitkerler arasynda Aıdos Esmaǵambetovtyń da esimi bar.
A. Esmaǵambetov Abylaıhannyń, Qazaqstan Prezıdenti Nursultan Nazarbaevtyń jáne AQSh-tyń 44-shi prezıdenti Barak Obamanyń sılıkon músinderin jasaǵan. Odan bólek, horror, trıller baǵytyndaǵy fılm akterlerine kúrdeli grımm jasaýmen aınalysady. Adamdarǵa estetıkalyq protez jasap, medıtsına salasyna da óz úlesin qosyp júr.
