Dert dendep barady – dáriger
ALMATY. QazAqparat – Qazir halyq arasynda indetke nemquraıdy qaraıtyndar kóbeıdi, tipti keıbir adamdar bul aýrýdyń baryna kúmánmen qaraıdy. Bul jóninde №7 qalalyq klınıkalyq aýrýhana janyndaǵy emhanada qurylǵan koronavırýs ınfektsııasymen kúres jónindegi mobıldi toptyń jetekshisi Aıgúl Nametqulova aıtty, dep habarlaıdy QazAqparat tilshisi.
Qazirgi tańda elimizde bul indetpen kúreste kóptegen jumystar atqarylyp jatyr. Máselen, №7 qalalyq klınıkalyqa aýrýhana janyndaǵy emhanada bilikti dárigerler men mıirbıkelerden mobıldik brıgada quryldy. Olardyń negizgi mindeti – osy aýrýǵa shaldyqqan naýqastardy úıine baryp baqylaý ne emdeý.
Atalǵan mobıldi toptyń jetekshisi Aıgúl Nametqulovanyń aıtýynsha, karantın jeńildetilip, jazdyń jaımashýaq kúnderi bastalǵaly halyq arqany keńge salyp, saqtyq sharalaryn saqtamaıtyn boldy. Sanıtarlyq talaptardy sanaly túrde oryndamaıdy. Bul indettiń taralýyna sebep.
«Búgingi tańda elimizde koronavırýs indeti halyq arasynda tez tarap jatqan jaı bar. Qazirgi ýaqytta Qazaqstanda koronavırýs juqtyrǵandardyń sany 18 myńǵa jýyqtap qaldy. Árıne, bul alańdatarlyq jaǵdaı. Bunyń basty sebebiniń biri - kóptegen adamdar profılaktıkalyq sharalardy tolyǵymen júzege asyrmaıdy. Mysaly, kópshilik jınalatyn jerlerde – qoǵamdyq kólikterde, oıyn-saýyq ortalyqtarynda maska taqpaıdy. Kezek kútý kezinde araqashyqtyqty saktamaıdy. Osynyń bári aýrýdyń órshýine ákelip otyr. Al keıbir adamdar bul aýrý múldem joq dep sanaıdy»,– deıdi Aıgúl Nametqulova
Sonymen qatar, ol bul vırýs – COVID-19 aýa arqyly tez taraıtyn ınfektsııalyq aýrý ekenin taǵy bir márte atap ótti. Іndet juqtyrǵan adamnyń dene qyzýy kóterilip, jótel men entigý paıda bolady. Sonymen qatar, aýa jetpeý, álsizdik sııaqty belgileri bar. Qazir sımptomsyz naýqastardyń sany kóbeıdi. Dál osy jaǵdaı dárigerlerdi alańdatady.
«COVID-2019 vırýsy týraly eskertýler qys aıynan bastap aıtylǵanyna qaramastan dert dendep barady. Álemdi álekke salǵan indettiń beti áli qaıtpaı tur. Onyń ústinde sımptomsyz syrqattardyń kóbeıýi de atalǵan indettiń tipti de keń taralý qaterin arttyra tústi. Buǵan kúndelikti buqaralyq aqparat qurladary aryqyly berilip jatqan statıstıka dálel»,– deıdi Almaty qalalyq №7 klınıkalyq aýrýhanasyndaǵy koronavırýs ınfektsııasymen kúres jónindegi mobıldi toptyń jetekshisi Aıgúl Nametqulova.
Maman qazirgi jaǵdaıda qoǵamdyq oryndarǵa barmaı, karantın talaptaryn qatań saqtaý asa mańyzdy ekenin eskertedi.
Negizgi aldyn alý sharalary:
– Qol jýý erejesin saqtaý. Jıi qoldy sabynmen jýý nemese antıseptıkpen tazalaý;
– Maska taǵý. Ásirese adam kóp jınalatyn oryndarda;
– Adam kóp jınalatyn jerlerge barmaý;
– Araqashyqtyqty saqtaý;
– Las qolmen kóz, aýyz– muryndy ustamaý;
Eger dene qyzýyńyz kóterilse, jótel men álsizdik baıqalsa ýıde qalyp, emhanaǵa habarlasyńyz.
