Derevıanchenkonyń bapkeri onyń Golovkınnen artyq tustaryn atady

NUR-SULTAN. QazAqparat – Ýkraınalyq kásipqoı boksshy Sergeı Derevıanchenkonyń bapkeri Andre Roze óz shákirtiniń Gennadıı Golovkınmen bolatyn jekpe-jekke qalaı daıyndalatynyn aıtty, dep habarlaıdy QazAqparat Sports.kz-ke silteme jasap.

Buǵan deıin habarlaǵanymyzdaı, Golovkın men Derevıanchenko 5 qazan kúni Nıý-Iorkte IBF-tiń orta salmaq sanatynda bos turǵan álem chempıony tıtýly úshin aıqas ótkizýi múmkin. Kezdesý ótetindeı bolsa, Rozeniń Golovkınmen úshinshi ret joly qıylysady. Buǵan deıin ol Kertıs Stıvens pen Denıel Djeıkobsty Golovkınge qarsy jekpe-jekterge daıyndaǵan.

«Bul Sergeıdiń ómirindegi eń úlken aıqas bolady. Sondyqtan bizdiń komanda búkil nazaryn sonyń jattyǵý lagerine aýdarady», - dedi Roze.

Ol Golovkın eki aıqasta da Saýl Alvaresti jeńdi dep sanaıtynyn jetkizdi.

«Menińshe, GGG – jeńilmegen boksshy. Álemdegi kópshilik adamdar sııaqty men de «Kanelomen» ótkizgen eki aıqasynda da Golovkın jeńdi dep sanaımyn. Ol joıqyn boksshy, biraq Sergeı de myqty. Onyń jeńetinine senemin. Sergeı Golovkın paıdalanatyndaı kóp qatelik jibermeıdi. Onyń ústine ol tyń boksshy. Osynyń bári Sergeıdiń IBF tujyrymy boıynsha jańa álem chempıony bolýyna jol ashady dep oılaımyn. Bapker retinde buǵan deıin eki ret Golovkındi jeńýge áreket etip kórdim. Úshinshide buǵan qol jetkizemin dep senemin», - deıdi Roze Boxingscene.com-ǵa bergen suhbatynda.