Derekter ortalyqtaryn salqyndatýda sýdy kóp qajet etetin tehnologııalardan bas tartý usynyldy

ASTANA. KAZINFORM – Derekter ortalyqtaryn salqyndatý úshin sýdy kóp qajet etpeıtin jańa tehnologııalardy qoldaný kerek. Bul týraly Afına ulttyq observatorııasynyń Qorshaǵan ortany zertteý jáne ornyqty damý ınstıtýtynyń ǵylymı dırektory, ASHRAE qaýymdastyǵynyń múshesi Konstantınos Balaras Astanada ótken paneldik sessııada aıtty.

Microsoft jasandy ıntellekt derekter ortalyǵyna 80 mıllıard dollar ınvestıtsııa salady
Foto: news.microsoft.com

Sarapshynyń sózinshe, buryn derekter ortalyqtaryn salqyndatý úshin sýdy býlandyrýǵa negizdelgen tehnologııalar keńinen qoldanylǵan. Alaıda mundaı júıeler sýdy kóp tutynatyndyqtan, sý tapshylyǵy bar óńirlerde qıyndyq týǵyzýy múmkin.

– Mysaly, ortasha kólemdegi derekter ortalyǵyn iske qosýdy elestetińiz. Bul sol jerde kenetten 10 myń nemese 50 myń turǵyny bar qala paıda bolǵanmen birdeı. Óıtkeni ortalyqtyń qajettiligin óteý úshin sonshalyqty kólemde sý kerek bolýy múmkin. Bul elektr jelilerine de, sý resýrstaryna da qosymsha salmaq túsiredi, – dep túsindirdi Konstantınos Balaras.

Onyń aıtýynsha, qazir derekter ortalyqtaryn salqyndatýdyń balama tásilderi bar. Olar sýdy býlandyrýǵa táýeldi emes jáne elektr energııasyn tıimdi paıdalanýǵa múmkindik beredi.

– Aldaǵy ýaqytta IT jabdyqtaryn salqyndatýdyń basqa joldaryn qarastyrý qajet. Qazir sýdy býlandyrýdy qajet etpeıtin, energııany az tutynatyn tehnologııalar qoljetimdi. Sondyqtan ınjenerler jabdyqtardy tańdaǵanda osy múmkindikterdi eskerýi tıis, – dedi sarapshy.

Konstantınos Balaras derekter ortalyqtaryn jobalaý men paıdalanýda halyqaralyq ASHRAE uıymynyń standarttary men usynymdaryn basshylyqqa alýdyń mańyzyn da atap ótti. Onyń sózinshe, bul ınjenerlerge tıimdi tehnologııalardy tańdap, ortalyqtardyń jumysyn durys uıymdastyrýǵa kómektesedi.

Aıta keteıik, buǵan deıin Konstantınos Balaras Qazaqstandaǵy elektr energııasynyń tapshylyǵyn azaıtý úshin jańa qýat kózderin iske qosýmen shektelmeı, energııany únemdeýge jáne kórshi memlekettermen elektr almasý múmkindikterin keńeıtýge basymdyq berý qajet ekenin aıtqan edi.