Derekter qaýipsizdigi: Instagram balalarǵa arnalǵan jańa ereje engizdi
ASTANA. KAZINFORM – Instagram jasóspirimderdiń qaýipsizdigin arttyrýǵa baǵyttalǵan jańa múmkindikterdi engizdi. Áleýmettik jeli endi jasóspirimderge usynatyn taqyryptarǵa kóbirek kóńil bóledi, sonymen qatar «Úzilis al» múmkindigin engizedi, dep habarlaıdy Kommersant.ru saıty.
Áleýmettik jeli qoldanýshylarǵa ózderi jazylmaǵan jasóspirimderdi belgileýge nemese atap ótýge tyıym saldy.
Instagram sonymen qatar jasóspirimderdi uzaq ýaqyt boıy bir taqyrypqa nazar aýdarǵan bolsa, basqa taqyryptardy qaraýǵa shaqyrady. Ata-analar balalarynyń Instagram-da qansha ýaqyt ótkizetinin kórip, ýaqyt shegin belgileı alady.
«Úzilis al» múmkindigi paıdalanýshylarǵa qosymshaǵa kóp ýaqyt jumsaǵan jaǵdaıda áleýmettik jeliden úzilis usynady. Bul qyzmet AQSh, Ulybrıtanııa, Irlandııa, Kanada, Jańa Zelandııa jáne Aýstralııada iske qosylady.
Buryn Instagram eresek qoldanýshylarǵa olarǵa jazylmaǵan jasóspirimderge hat joldaýǵa tyıym saldy, sonymen qatar 16 jasqa tolmaǵan balalar úshin jańa akkaýnttardy jeke etip jasady.
Áleýmettik jeli kóptegen syn aıtylǵanyna baılanysty Instagram Kids qosymshasynyń balalarǵa arnalǵan nusqasyn ázirleýdi toqtatty.
Sondaı-aq, platformadaǵy kontent túrlerine shekteý qoıylady. Áleýmettik jelide mıllıondaǵan jas qoldanýshy tirkelgen. Shekteý tolyq iske qosylǵannan keıin, 16-17 jastaǵy jasóspirimder qoldanbany qalaýynsha ózgerte alady. Biraq 13-14 jastaǵylar úshin ata-anasynyń ruqsaty qajet. Kompanııa mundaı ózgeristi platformada kámeletke tolmaǵandarǵa qarsy qaýiptiń aldyn alý maqsatynda júzege asyrǵan.
