Derbes kassatsııalyq ınstantsııa qurylsa, eldiń sotqa degen senimi arta túsedi - Senat
ASTANA. KAZINFORM - Senattyń Konstıtýtsııalyq zańnama, sot júıesi jáne quqyq qorǵaý organdary komıtetiniń depýtattary kassatsııalyq sot qurý máselesi týraly otyrys ótkizdi.
Komıtet tóraǵasy Nurlan Beknazarov Memleket basshysy Qasym-Jomart Toqaev ótken jyldyń qyrkúıek aıynda qazaqstandyq bıznesmendermen kezdesý barysynda azamattardyń quqyqtaryn sapaly qorǵaýdy qamtamasyz etý úshin jekelegen kassatsııalyq sottar qurýdyń mańyzyn atap ótkenin eske saldy.
«Búginde qylmystyq jáne azamattyq isterdiń tek 5%-y kassatsııaǵa túsedi jáne bul azamattardyń suranysyna saı kelmeıdi. Osyǵan baılanysty zańgerler jáne kásipkerler qaýymdastyǵymen derbes kassatsııalyq ınstantsııa qurý máselesi boıynsha aqyldastyq turǵysynda keńesý qajettigi týyndady. Parlament depýtattaryn elimiz Prezıdentiniń zańdylyq pen quqyqtyq tártipke qol jetkizýge yqpal etetin tıimdi sot júıesin qurýdy kózdeıtin tapsyrmalaryn zańnamalyq turǵyda qamtamasyz etý jóninde aýqymdy jumys kútip tur», - dedi senator.
Senator Janna Asanova óz kezeginde táýelsiz kassatsııalyq ınstantsııa qurý sot tóreliginiń sapasyn jáne azamattardyń jalpy sottarǵa degen senim deńgeıin arttyrýǵa yqpal etetinin atap ótti.
Sondaı-aq Parlament pen Joǵarǵy sottyń aldynda táýelsiz kassatsııalyq sottardyń ońtaıly nusqasyn engizý jáne zańnamalyq turǵydan bekitý mindeti turǵanyn jetkizdi.
Shara barysynda Joǵarǵy sottyń azamattyq ister jónindegi sot alqasynyń tóraǵasy Nurserik Sháripov, Bas prokýratýranyń, respýblıkalyq advokattar alqasynyń, «Qazaqstan zańgerler odaǵy» respýblıkalyq qoǵamdyq birlestiginiń, Joǵarǵy sot janyndaǵy sot tóreligi akademııasynyń ókilderi, ǵalymdar jáne basqalar óz usynystaryn bildirdi.
Otyrys barysynda qatysýshylar tarapynan berilgen usynystar Parlamenttegi sot júıesiniń máseleleri boıynsha tıisti zań jobalarymen jumys kezinde qaralady.
