Derbes derekterge qol jetkizý servısi endi qalaı jumys isteıdi

ASTANA. KAZINFORM — Qazaqstanda buıryqqa jáne derbes derekterge qol jetkizýdi baqylaý jónindegi memlekettik servıstiń jumys isteý qaǵıdalaryna birqatar ózgeris pen tolyqtyrý engizildi. 

Atap aıtqanda, «derbes derekter» uǵymynyń anyqtamasy naqtylandy. Endi oǵan elektrondyq, qaǵaz nemese ózge de materıaldyq tasymaldaǵyshta tirkelgen, naqty nemese anyqtalatyn tulǵaǵa qatysty derekter, sonyń ishinde bıometrııalyq derekter de kiredi.

Sonymen qatar buıryqpen «derbes derekterdi avtomattandyrylǵan óńdeý» degen jańa uǵym engizildi. Ol menshik ıesi, operator nemese úshinshi tulǵalardyń qatysýynsyz aqparattandyrý obektileri arqyly júzege asyrylatyn derekterdi óńdeý protsesi.

Qaǵıdalarǵa sáıkes memlekettik servıs mynadaı negizgi protsesterdi avtomattandyrý kezinde qoldanylady:

— derbes derekterge qol jetkizý kezinde menshik ıeleri, operatorlar jáne úshinshi tulǵalardyń derekter sýbektisimen jáne ýákiletti organmen aqparattyq ózara is-qımyly;

— derekter sýbektisiniń nemese onyń zańdy ókiliniń derekterdi jınaýǵa jáne óńdeýge kelisim berýi nemese odan bas tartýy;

— sýbektiniń buryn bergen kelisimin keri qaıtaryp alýy;

— derbes derektermen jasalatyn áreketter týraly sýbektini habardar etý (qol jetkizý, qaraý, ózgertý, tolyqtyrý, berý, buǵattaý nemese joıý);

— derekter sýbektisine onyń derekterin jınaýǵa nemese óńdeýge kelisimi bar operatorlar men menshik ıeleri týraly aqparat usyný.

Sondaı-aq qujatta derbes derekterge qol jetkizýdiń birneshe mehanızmi aıqyndalǵan. Olardyń qatarynda proaktıvti qyzmetterdi kórsetý kezinde saýal/jaýap almasý arqyly qol jetkizý, kelisimsiz qol jetkizý jaǵdaıynda protokoldaý rejımi, sondaı-aq SMS-habarlamalar arqyly kelisim alý tártibi bar. 

Aıta ketelik Úkimet jeke derekterdi qorǵaý talabyn jańartatyn qujatty bekitken edi.