Derbes derekterdiń tarap ketýinen 100% qorǵalǵan el joq - mınıstrlik
Tsıfrlyq damý, ınnovatsııalar jáne aeroǵarysh ónerkásibi mınıstrligi aqparattyq qaýipsizdik komıtetiniń tóraǵasy Rýslan Ábdiqalyqov qazaqstandyqtardyń derbes derekteri sheteldik Telegram-botta tarap ketýine pikir bildirdi, dep habarlaıdy QazAqparat tilshisi.
«Qazirgi zańnamada derbes derekterdi qorǵaıtyn normalar barshylyq. Másele zańnyń jetkilikti deńgeıde jaqsy bolmaýynda emes, ondaǵy talaptardyń qanshalyqty oryndalyp oytrǵanynda. Biz UQK-daǵy áriptesterimizge suraý salǵanbyz, olar taldaý jasap bitirdi. Bul — osyndaı jalǵyz oqıǵa emes. Ár kezde ártúrli júıeden derbes derekter qoldy bolǵan», — dedi ol «Amanat» partııasy ótkizgen baspasóz máslıhatynda.
Onyń aıtýynsha, sońǵy oqıǵada kóptegen azamattyń jeke deregi tarap ketkenimen, eshkimnen resmı shaǵym túspegen.
«Bizge tolyǵyraq málimet berilýi kerek. Sodan keıin memlekettik baqylaý baǵytynda jumys bastaımyz. Aqparattyq júıe ıelerine shyǵyp, derbes derekterdi qalaı qorǵap otyrǵanyn tekseremiz. Derbesterdiń tarap ketýinen 100 paıyz saqtandyrylǵan el joq. Búgin 100 paıyz saqtandyryldy degenniń ózinde erteń ony buzatyn bir amal tabylýy múmkin. Sondyqtan ondaı jaıtqa árdaıym daıyn bolýymyz kerek. Derekter tarap ketti me, ol arnany alaıaqtardyń qolyna tımeı turyp jabý qajet. Siz aıtyp otyrǵan jaıttan keıin neshe shaǵym tústi dep oılaısyz? Bir de bir shaǵym bolǵan joq. Bul azamattardyń derbes dereginiń tarap ketýinen qandaı problema týyndaıtynyn bilmeıtinin kórsetedi», — dedi Rýslan Ábdiqalyqov.
Eske salaıyq, Tsıfrlyq damý, ınnovatsııalar jáne aeroǵarysh ónerkásibi mınıstrligi sheteldik Telegram-botta qazaqstandyqtardyń derbes derekteri ruqsatsyz jarııalanǵanyn rastaǵan edi.
