Derbes derekterdiń senimdi qorǵalýyn qamtamasyz etýge aıryqsha nazar aýdarý kerek – Memleket basshysy

ASTANA. KAZINFORM — Úkimet tıisti mekemelermen birge azamattardyń derekterin qorǵaý máselesin keshendi túrde muqııat saralaýy tıis. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev aıtty.

- Tsıfrlyq transformatsııa kezeńinde, eń aldymen, jeke adamnyń múddesine nuqsan kelýi múmkin. Sondyqtan derbes derekterdiń senimdi qorǵalýyn qamtamasyz etýge aıryqsha nazar aýdarý kerek. Derbes derekterdiń tarap ketýi, onlaın-alaıaqtyq, jasandy ıntellektini qylmys quraly retinde paıdalaný – munyń bári bizdiń elde de, shetelde de qalypty jaǵdaıǵa aınaldy. Biz Qarjylyq monıtorıng agenttigi men basqa da quqyq qorǵaý organdaryn jumyldyryp, kıberqylmyspen jáne alaıaqtyqpen kúresý úshin naqty sharalar qabyldap jatyrmyz, - dedi Memleket basshysy.

Prezıdenttiń dereginshe, Ulttyq antıfrod-ortalyǵy 90 myń azamatty alaıaqtardyń arbaýynan saqtap qaldy.

-Úkimetke tıisti mekemelermen birge kıberqaýipsizdikti qamtamasyz etý jáne azamattardyń derekterin qorǵaý máselesin keshendi túrde muqııat saralap, qaraýdy tapsyramyn. Budan bólek, jaqynda Ulttyq quryltaıda atap ótkenimdeı, tsıfrlyq derbes derekterdi qorǵaý máselesi konstıtýtsııalyq deńgeıde bekitilip, aıqyndalýy kerek, - dedi Qasym-Jomat Toqaev.

Buǵan deıin Prezıdent salyq júıesin jappaı tsıfrlandyrýǵa shuǵyl kirisken jón ekenin aıtqan edi.