Derbes derekterdi qorǵaý jáne kıberqaýipsizdikke qatysty jańa tetikter engiziledi
ASTANA. KAZINFORM - Májiliste «Qazaqstan Respýblıkasynyń keıbir zańnamalyq aktilerine tsıfrlandyrý, derbes derekterdi qorǵaý, jol júrisi jáne kóliktegi ozyq tehnologııalardy retteý máseleleri boıynsha ózgerister men tolyqtyrýlar engizý týraly» zań jobasy qaraldy.
Zań jobasyn tanystyrǵan Májilis depýtaty Ekaterına Smyshlıaeva qazirgi tańda qoǵamda qaýipsizdik máseleleriniń ózektiligi artyp otyrǵanyn atap ótti.
Onyń aıtýynsha, qujat jol qozǵalysy, tsıfrlyq ınfraqurylym, derbes derekterdi qorǵaý jáne kıberqaýipsizdik baǵyttaryndaǵy birqatar júıeli ózgeristerdi kózdeıdi.
- Zań jobasy qoǵamdaǵy qaýipsizdik talaptaryn kúsheıtýge, tsıfrlyq ortadaǵy táýekelderdi azaıtýǵa jáne azamattardyń derbes derekterin qorǵaý deńgeıin arttyrýǵa baǵyttalǵan, – dedi depýtat Májilis otyrysynda.
Sonymen qatar zań jobasynda derbes derekterdi qorǵaý jáne kıberqaýipsizdikke qatysty jańa tetikter engiziledi. Atap aıtqanda, jeke derekter operatorlary táýekel deńgeıine qaraı shaǵyn, orta jáne iri sanattarǵa bólinedi.
Sondaı-aq azamattarǵa olardyń derekteri ashyq tarap ketken jaǵdaılardy tekserýge múmkindik beretin memlekettik tizilim engizý kózdelgen.
- Derbes derekterdi maskalaý jáne heshteý talaptary kúsheıtilip, sot sheshimderi men memlekettik satyp alýǵa qatysty qujattardaǵy jeke málimetterdi qorǵaý tetikteri qarastyrylýda. Sonymen qatar azamattardyń jeke derekterin jarııalaýǵa kelisim berý tártibi naqtylanady, - dedi spıker.
Sonymen qatar depýtat kıberqaýipsizdik salasynda tsıfrlyq ınfraqurylymnyń asa mańyzdy obektilerine qatysty memlekettik baqylaý fýnktsııalaryn qaıta bólý usynylǵan. Basqarý quzyreti Jasandy ıntellekt jáne tsıfrlyq damý mınıstrliginde saqtalsa, baqylaý fýnktsııalary Ulttyq qaýipsizdik komıtetine beriletinin atap ótti.
- Tsıfrlyq ınfraqurylymnyń turaqtylyǵy men qaýipsizdigi – ulttyq qaýipsizdiktiń ajyramas bóligi. Sondyqtan baqylaý tetikterin kúsheıtý qajet, – dep tolyqtyrdy ol.
Buǵan deıin Májilis depýtaty Nursultan Baıtilesov notarıýstarda derbes derekterdi qorǵaý tetikterine qatysty túsinik bergen edi.
