Derbes derekterdi qorǵaý talaptaryn buzǵandar 12 mln teńgeden asa aıyppul tóledi

ASTANA. KAZINFORM — Úkimet apparaty azamattardyń derbes derekterin qorǵaýǵa qatysty saýaldy qarap, tıisti sharalar qabyldanyp jatqanyn habarlady. Bul týraly QR Premer-mınıstriniń orynbasary — Jasandy ıntellekt jáne tsıfrlyq damý mınıstri Jaslan Mádıev málim etti.

— Qazaqstan Respýblıkasynyń Jasandy ıntellekt jáne tsıfrlyq damý mınıstrligi derbes derekterdi qorǵaý salasyndaǵy ýákiletti organ sanalady. Vedomstvo jeke jáne zańdy tulǵalardyń joldanymdaryn qaraıdy, jospardan tys tekserýler júrgizedi jáne derbes derekter týraly zańnamany buzǵany úshin jaýapkershilik sharalaryn qabyldaıdy, — dedi ol.

Onyń aıtýynsha, derbes derekterdi zańsyz paıdalanǵany úshin «Ákimshilik quqyq buzýshylyq týraly» kodekstiń 79-babynda jáne 641-babynyń 1) tarmaqshasynda ákimshilik jaýapkershilik, al Qylmystyq kodekstiń 147-babynda qylmystyq jaýapkershilik kózdelgen.

— 2025 jyldyń basynan bastap ýákiletti organ derbes derekterdi qorǵaý salasyndaǵy zańnamanyń saqtalýyna 69 jospardan tys tekserý júrgizdi. Onyń nátıjesinde jalpy 10 665 350 teńge kóleminde aıyppul salynyp, 22 zańdy jáne laýazymdy tulǵa ákimshilik jaýapkershilikke tartyldy, — dep atap ótti mınıstr.

Sonymen birge ol «Elektrondyq qujat jáne elektrondyq tsıfrlyq qoltańba týraly» zańdy buzǵany úshin sýbektige barmaı-aq 1 248 410 teńge somasyna 17 jeke tulǵa ákimshilik jaýapkershilikke tartylǵanyn aıtty.

Buǵan deıin, Májilis depýtaty azamattardyń derbes derekterin qorǵaý sharalaryn kúsheıtýdi usynǵan edi.