Derbes derekterdi qorǵaý kúsheıtilip, jeke qujattardyń qaǵaz kóshirmelerin jınaýǵa tyıym salynady
Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine aqparattyq qaýipsizdik, aqparattandyrý jáne tsıfrlyq aktıvter máseleleri boıynsha ózgerister men tolyqtyrýlar engizý týraly» Zańy birinshi oqylymda maquldandy, dep habarlaıdy Kazinform.
Bul zań aqparattyq qaýipsizdik jáne derbes derekterdi qorǵaý salasyndaǵy zańnamany odan ári jetildirý, sondaı-aq tsıfrlyq maınıng jónindegi qyzmetti retteý maqsatynda ázirlendi. Qujat aıasynda Ákimshilik quqyq buzýshylyq týraly, Kásipkerlik, Eńbek jáne «Halyq densaýlyǵy jáne densaýlyq saqtaý júıesi týraly» kodeksterge, sondaı-aq Qazaqstan Respýblıkasynyń 10 zańyna ózgerister men tolyqtyrýlar engizý eskerilgen.
«Zań derbes derekterdiń aınalymy men saqtalýy salasynda memlekettik baqylaýdy kúsheıtip, quqyqtyq bazasyn qalyptastyrady. Sondaı-aq, zańda operatorlar derbes derekter qaýipsizdiginiń buzylǵany týraly ýákiletti organǵa bir jumys kúninen keshikpeı habarlaýy mindettelgen. Al, aqparattyq júıelerdiń osal tustary men kemshilikterin der kezinde anyqtap, udaıy jetildirý maqsatynda aqparattyq júıelerdi zertteýshi úzdik mamandardy tartý da zańǵa engizilip otyr. Bul - álemdik tájirıbede bar shara. Sonymen qatar, memlekettik organdardyń aqparattyq qaýipsizdigin qamtamasyz etý maqsatynda ortalyq qurylyp, «elektrondy úkimettiń» biryńǵaı repozıtorııi naqtylanyp, onda baǵdarlamalyq ónimderdiń bastapqy kodtary saqtalady», - dedi senator Bıbigúl Jeksenbaı.
Onyń sózine qaraǵanda, memlekettik múddeni qorǵaý jáne ulttyq qaýipsizdikti qamtamasyz etý maqsatynda shetelden kóship kelýshilerden jeke basyn kýálandyratyn qujattardyń kóshirmelerin tapsyrý mindetteledi.
Derbes derekterdi qorǵaý salasyndaǵy ýákiletti organǵa (Tsıfrlyq damý, ınnovatsııalar jáne aeroǵarysh ónerkásibi mınıstrligi) málimetter jáne olardy qorǵaý týraly zańnamanyń saqtalýyn qamtamasyz etý úshin memlekettik baqylaýdyń qosymsha fýnktsııasy beriledi.
«Tsıfrlyq maınıng jónindegi qyzmetti jetildirý baǵytynda lıtsenzııadan aıyrý, onyń qoldanysyn toqtata turý jáne qaıta bastaý rásimi belgilenip otyr. Zańnyń tujyrymdamasy boıynsha Senattyń turaqty komıtetteriniń eskertýleri men usynystary bolǵan joq», - dedi B. Jeksenbaı.
Senattyń Halyqaralyq qatynastar, qorǵanys jáne qaýipsizdik komıtetiniń málimetine qaraǵanda, Qazaqstan Respýblıkasynyń zańdarynda tikeleı kózdelgen jaǵdaılardy qospaǵanda, jeke basyn kýálandyratyn qujattardyń qaǵaz kóshirmelerin jınaýǵa, óńdeýge tyıym salý belgilenedi.
