Derbes bilim berý uıymdarynyń qyzmetin jetildiretin zań jobasy birinshi oqylymda maquldandy - Májilis
QR Bilim jáne ǵylym mınıstri Aslan Sárinjipovtiń aıtýynsha, Zań jobasyn ázirleý derbes bilim berý uıymdarynyń qyzmeti barysynda týyndaıtyn, strategııalyq maqsattaryna qol jetkizýine kedergi keltirýi múmkin biratar máselelerdi retteý qajettiliginen týyndady.
«Zań jobasy derbes bilim berý uıymdarynyń akademııalyq basqarý júıesin jetildirýge jáne sapasyn qamtamsyz etýge baǵyttalǵan. 2011 jyly Nazarbaev ýnıversıteti, Nazarbaev zııatkerlik mektepteri jáne Nazarbaev qorynyń mártebesi týraly zańmen derbes bilim berý uıymdarynyń negizgi jumys isteý qaǵıdattary, onyń ishinde akademııalyq erkindik jáne derbes bilim berý qaǵıdattary aıqyndaldy. Osy zańdy iske asyrý tájirıbesi derbes bilim berý uıymdarynyń damýyna oń áser tıgizdi. Alaıda, derbes bilim berý uıymdary óz qyzmet protsesinde zańnamalyq deńgeıde qajet etetin birqatar máselelerge tap boldy. Zań jobasyndaǵy túzetýler bilim berý uıymdarynyń damýyndaǵy kelesi qadam bolyp tabylady. Zań jobasy derbes Qazaqstan Respýblıkasynyń Eńbek kodeksine, bıýdjet kodeksine, salyqtar jáne bıýdjetke tólenetin basqa da mindetti tólemder týraly, «QR Bilim týraly», «Nazarbaev Ýnıversıteti» , «Nazarbaev zııatkerlik mektepteri jáne «Nazarbaev qory» mártebesi týraly», Memlekettik múlik týraly zańdarǵa ózgerister men tolyqtyrýlar engizedi», - dedi depýtattar aldynda baıandama jasaǵan mınıstr.
Onda nysanaly salymdar bólýdiń múmkin bolmaýy, bilim berý protsesin grantpen jáne stıpendııamen qamtamasyz etý máselelerin retteýdegi olqylyqtar, jer zańnamasynyń zııatkerlik-ınnovatsııalyq klasterdi damytý úshin derbes bilim uıymdarynyń jer ýchaskelerin satyp alýyna memlekettik bıýdjetten edáýir qarajat bólýge májbúrleıtin erejeleri, salyq salý máseleleri qarastyrylyp otyr.
Zań jobasynyń qorytyndysynda málim etilgenindeı, derbes bilim berý uıymdary pılottyq jobalar, eksperımenttik alańdar bolyp tabylady. Atalǵan jobalardy iske asyrý barysynda jınaqtalǵan tájirıbe bilim berý júıesin damytýdyń keıingi kezeńderinde paıdalanylatyn bolady. Osyǵan baılanysty, zań jobasynyń erejeleri derbes uıymdardyń qyzmetin retteýge ǵana emes, orta jáne joǵary bilim berý júıesin odan ári jetildirýge de baǵyttalǵan.