Derbes bilim berý uıymdarynyń qyzmetin retteýge baǵyttalǵan zań jobasy maquldandy - Májilis
ASTANA. QazAqparat - Búgin QR Parlamenti Májilisiniń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine derbes bilim berý uıymdarynyń qyzmetin retteý máseleleri boıynsha ózgerister men tolyqtyrýlar engizý týraly» zań jobasyn úshinshi oqylymda maquldady. Endi qujat Parlament Senatynyń qaraýyna joldanady.
Zań jobasy boıynsha derbes bilim berý uıymdary negizinen pılottyq jobalar, eksperımenttik alańdar bolyp tabylady. Atalǵan jobalardy iske asyrý barysynda jınaqtalǵan tájirıbe bilim berý júıesin damytýdyń aldaǵy kezeńderinde paıdalanylmaq. Osyǵan baılanysty, zań jobasynyń erejeleri derbes uıymdardyń qyzmetin retteýge ǵana emes, orta jáne joǵary bilim berý júıesin odan ári jetildirýge de baǵyttalyp otyr.
Tutastaı alǵanda, zań jobasy derbes bilim berý uıymdarynyń akademııalyq basqarý júıesin jetildirýdi jáne sapasyn qamtamasyz etýdi qarastyratyn bolady.
Buǵan deıin, 27 mamyrda birinshi jáne ekinshi oqylymda maquldanǵan zań jobasyn úshinshi oqylymǵa ázirleý barysynda depýtattar birqatar jazbasha usynystar engizgen. Bul usynystardy jumys toby qabyldady.
Endi qujat Senatta talqylanbaq.
