Derbentte shabýyl nátıjesinde bir adam qaza taýyp, 11 adam jaralandy
ASTANA. QazAqparat - Derbentte synaq alańyna jınalǵan kelýshilerge belgisiz bireýler oq jaýdyrtyp, bir adam qaza taýyp, 11 adam jaraqat aldy.
TASS-qa Reseı Tergeý Komıtetiniń Daǵystan boıynsha basqarmasynyń resmı ókili habarlaǵandaı, sársenbige qaraǵan túni Derbenttegi Naryn qala bekinisiniń aldyndaǵy synaq alańyna jeke kólikterimen 20 shaqty demalýshy top kelgen.
«Alańǵa jaqyn ornalasqan qaraǵaı ormany jaǵynan belgisiz bireýler avtomatty qarýmen synaq alańynyń ishindegi adamdarǵa oq jaýdyrtqan, shabýyldaýshylar boı tasalap úlgergen», - dep habarlady RTK ókili.
Atys bolǵan orynda túrli kalıbrli 60-tan astam gılza tabyldy.
Interfakstiń habarlaýynsha, qaza tapqan adam - shekara qyzmetiniń áskerı qyzmetshisi. Al onyń jaralanǵan qyzmettesi gospıtalǵa jetkizildi.
Daǵystan densaýlyq saqtaý mınıstrliginiń derekterine sáıkes zardap shekken tórt adamnyń barlyǵynyń jaǵdaıy aýyr.
