Depýtattyń arnaıy shaqyrýymen kelgen Abaı aýdanynyń oqýshylary Astanamen tanysty
ASTANA. 21 qańtar. QazAqparat - Búgin Parlament Májilisiniń depýtaty, Qarjy jáne bıýdjet komıtetiniń múshesi Nurtaı Sabılıanovtyń arnaıy shaqyrýymen elordaǵa Shyǵys Qazaqstan oblysynyń Abaı aýdanynan bir top mektep oqýshylary saıahattap keldi.
Bul týraly Májilistiń baspasóz qyzmetinen habarlandy.
Kıeli Abaı óńirinen kelgen jıyrma bir mektep oqýshysy men olardyń tórt jetekshisi Astananyń mádenı oryndaryn, sonyń ishinde «Báıterek» keshenin, Tuńǵysh Prezıdent murajaıyn, Beıbitshilik jáne kelisim saraıyn, «Dýman» oıyn-saýyq ortalyǵyn aralap, Parlament Májilisiniń ǵımaratynda zań shyǵarýshylar mekemesimen tanysty. Olar úshin arnaıy ekskýrsııa uıymdastyrylyp, zań shyǵarý organynyń kúndelikti qyzmeti týraly depýtat Nurtaı Sabılıanov aıtyp berdi.
Depýtat Nurtaı Sabılıanovtyń Shyǵys Qazaqstan oblysynyń mektep oqýshylary men turǵyndary úshin osyndaı is-shara uıymdastyrýy birneshe jyldan beri dástúrge aınalǵandaı. Ol mundaı is-shara mektep oqýshylarynyń patrıottyq sezimderin, rýhanı kelbetin damytý úshin mańyzy zor ekenin atap ótti. Óıtkeni Elbasynyń tikeleı bastamasymen negizi qalanǵan Astanany kórý, ondaǵy mádenı oryndarmen tanysý aýyldan kelgen mektep oqýshylary men jastarǵa aıryqsha qýanysh syılaıtyny sózsiz.
