Depýtattyqqa saılap jatsa, odan bas tartpaımyn - Serik Sápıev
ASTANA. QazAqparat - Búgin «Nur Otan» partııasynyń kezekten tys sezinde Olımpıada chempıony, «Astana Arlans» boks klýbynyń basshysy Serik Sápıev QR Parlamenti Májilisine usynylatyn partııalyq tizimde bekitildi. Osyǵan oraı, ol tilshilerge bergen suhbatynda halyq qalaýlysy bolýǵa daıyn ekenin aıtty.
Sizdi depýtattyqqa saılap jatsa, «Astana Arlans» klýbynyń basshylyǵynan ketesiz be?» degen saýalǵa Serik Sápıev: «Árıne, daıynmyn. Partııa meni usynyp jatyr, ary qaraı depýtattyqqa saılap jatsa, odan bas tartpaımyn. Men qandaı jaýapkershilikke bara jatqanymdy bilemin, sondyqtan barlyǵyna da daıynmyn. Men bul taqyrypta týystarymmen, jaqyndarymmen, dostarymmen talqyladym. Depýtattyqqa usynylǵan Gennadıı Golovkın, Ilıa Ilın syndy sportshylardyń pikirin bilmeımin buǵan baılanysty, biraq bir ret suradym, árıne, alaıda oǵan olardyń tarapynan jaýap bolmady», - dedi S.Sápıev sez otyrysy aıaqtalysymen.
Onyń aıtýynsha, depýtattyq mandat úlken jaýapkershilik jáne ol sportshy retinde eldegi halyqtyń sporttyq áleýetin arttyrýǵa, sporttyń sala retinde qaryshtaýyna úles qosýǵa qulyqty.
«Bizde halyqtyń keminde 30 paıyzyn buqaralyq sportqa tartý maqsaty qoıylǵan. Sonyń jolynda tıisti jumystar jasalýda. Bizge halyqtyń sportqa degen kózqarasyn ózgertý qajet. Mysaly, Qaraǵandyda sport salasy jaqsy damyǵan, men basqa óńirlerge baryp kórip júrmin. Salystyryp júrmin. Sondyqtan men barlyq óńirlerdi aralap, sportty nasıhattaýǵa tyrysamyn. Qazaqstannyń barlyq óńirleri qalys qalmaǵanyn qalar edim», - dedi S.Sápıev.
