Depýtattyq saýal: Astana-Jezqazǵan poıyzyn tekserý kerek
ASTANA. QazAqparat - Parlament Májilisiniń depýtaty Asylbek Qojahmetov Jezqazǵan-Astana poıyzyndaǵy halyqtyń shaǵymdaryna baılanysty depýtattyq saýal joldady, dep habarlaıdy «QazAqparat» HAA tilshisi.
«Jezqazǵan óńiriniń turǵyndarynyń shaǵym túsirýi toqtaıtyn emes. Bul másele kópten beri sheshimin tappaı keledi. QR IDM men «QTJ» UK» AQ-nyń byltyrǵy jyly bergen jaýaptarynda Jezqazǵan-Astana baǵytyndaǵy № 307-308 poıyz kún saıyn júretini habarlanǵan bolatyn. Al jolaýshylardy tasymaldaýǵa mindettelgen jeke tasymaldaýshy kompanııa «Maral-Nur» JShS máseleni sheshedi delingen edi», - deıdi májilismen Investıtsııalar jáne damý mınıstri Jeńis Qasymbektiń atyna joldaǵan depýtattyq saýalynda.
Dese de, Jezqazǵan qalasynyń turǵyndary atalǵan baǵyttaǵy № 307-308 jolaýshylar poıyzynda 12 vagon baryn, bul qajettiliktiń 70%-75% ǵana jaýyp turǵanyn aıtýda.
«Temir jol kassalarynda bılet alý múmkin emes. Jolserikterden bılet satyp alý syzbasy saqtalyp otyr. Ásirese, jazda jáne qysta vagondardyń jetispeýshiligi qatty seziledi. 12 vagonnyń ekeýi ǵana jańartyldy. Qalǵany 10 jyl boıy jóndelmegen. Sýyq ári terezeleri tesik», - deıdi Qojahmetov.
Depýtat óz sózinde jezqazǵandyq poıyzdar elimizdegi eń qolaısyz temir jol kóligi ekenine kózi jetkenin aıtady.
«Osy jaǵdaıdy eskere otyryp, Jezqazǵan-Astana baǵytyndaǵy jolaýshylardyń aǵymyn tekserýińizdi suraımyn. «Maral-Nur» JShS-niń konkýrstyq mindettemelirn oryndap otyrǵanyn tekserip, kemshilikter anyqtalsa sharalar qabyldansa deımin. «QTJ» UK» AQ-men birge №307-308 poıyzdyń naqty ahýalyna baǵa berýdi suraımyn», - deıdi Qojahmetov.
