Depýtattyq korpýs jumysynan shıraqtyq talap etilip otyr - Májilis Tóraǵasy
ASTANA. QazAqparat - Búgin QR Parlamenti Májilisiniń tórtinshi sessııadaǵy alǵashqy jalpy otyrysy bolyp ótti. Onda palata Tóraǵasy Qabıbolla Jaqypov Elbasy aıqyndaǵan mindetterdi júzege asyrýǵa depýtatyq korpýsty barynsha jaýaptylyqpen qaraýǵa shaqyrdy.
«Keshe sessııany ashý barysynda Memleket basshysy bizdiń aldymyzǵa búgingi kúnniń talaptarynan týyndaıtyn aýqymdy mindetter qoıdy. Elbasy aıqyndap, alda el ómirine engiziletin zań jobalaryn men úsh topqa bóler edim. Bular - Qazaqstan ekonomıkasynyń ornyqtylyǵyna baǵyttalǵan zań jobalary, ekinshisi - eldiń turmysyn jaqsartýǵa, úshinshi - el qaýipsizdigin qamtamasyz etýge baǵyttalǵan qujattar. Bundaı basymdyq berilgen qujattardyń ózi aldaǵy sessııanyń zań shyǵarmashylyq úderisiniń qaýyrt bolatynyn kórsetedi», - dedi Májilis spıkeri.
Sonymen qatar, Tóraǵa búgingi kúnniń ózinde depýtattar Prezıdent shuǵyl dep jarııalaǵan memlekettik organdar arasyndaǵy quzyrettiliktiń arajigin ajyratýǵa baǵyttalǵan eki zań jobasyn jumysqa alǵanyn jetkizdi. Onyń aıtýynsha, Memleket basshysy basymdyq bergen zań jobalarynyń barlyǵyn Parlament jiti qarap, óz merziminde qorytyndysyn shyǵarýy kerek.
«Ásirese, azamattardyń turmysyn jaqsartatyn, kásipkerlikti damytýǵa baǵyttalǵan, agroónerkásip keshendi damytý, jer qoınaýyn paıdalaný, bilim berý, kóshi-qon máselelerin qamtyǵan qujattar asa mańyzdy. Sondyqtan, aldaǵy jumysymyzda shıraqtyq talap etiletin qarbalastar kútip tur. Sol úshin barlyq depýtattyq korpýsty, parlamenttik fraktsııalardy aldymyzǵa qoıylǵan mindetterdi joǵary kásibı deńgeıde atqarýǵa shaqyramyn», - dedi Q. Jaqypov.
