Depýtattyq korpýs Prezıdent bastamalaryn zań jaǵynan qamtamasyz etti - Májilis Tóraǵasy
«Eń aldymen, depýtattyq korpýs Memleket basshysy alǵa tartqan saıası reformany zań jaǵynan qamtamasyz etti. Bul baǵytta elimizdiń «Saılaý týraly» Konstıtýtsııalyq zań jobasyna eleýli túzetýler engizildi. Onda Prezıdenttiń usynysy boıynsha saıası partııalardyń Májiliske ótý shegi 7-den 5 paıyzǵa deıin tómendetildi», - dedi N. Nyǵmatýlın.
Sonymen qatar ol saılaýda beriletin bıýlletenderge «barlyǵyna qarsymyn» degen jańa baǵan engizilgenin eske saldy. Taǵy bir erekshelik – aýyldyń jáne aýyldyq okrýg ákimderin tikeleı saılaýdy qatamasyz etetin normalar qosyldy. Bul normalar memlekettik organdar men halyq arasyndaǵy baılanysty kúsheıtýge, ákimderdiń turǵyndar aldyndaǵy jaýapkershiligin nyǵaıtýǵa jáne aýyl azamattarynyń saıası belsendiligin odan ári arttyrýǵa yqpal etedi.
«Osy sessııada biz qabyldaǵan jáne búkil eldiń nazarynda bolǵan taǵy bir zań jobasy – ol «Qazaqstan Respýblıkasynyń keıbir zańnamalyq aktilerine jer qatynastary máseleleri boıynsha ózgerister men tolyqtyrýlar engizý týraly» qujat. Osyǵan baılanysty tikeleı Memleket basshysy Qasym-Jomart Toqaevtyń bastamasymen zań deıgeıinde naqty sheshim qabyldandy. Endi, jerimizdi sheteldikterge satýǵa da, jalǵa berýge de tolyqtaı tyıym salyndy. Osy salanyń basqa suraqtaryn sheshý úshin Parlament jer qatynastary týraly zań qabyldady. Zańǵa aýyl sharýashylyǵy maqsatyndaǵy jerlerdi jalǵa berý ınstıtýtyn saqtaı otyryp, jerdi jekemenshikke berýdi 5 jylǵa toqtatý týraly norma engizildi», - dedi Májilis tóraǵasy.
Budan buryn habarlanǵandaı, Búgin Parlament palatalarynyń birlesken otyrysy ótip, onda jetinshi saılanǵan Parlamenttiń birinshi sessııasy resmı túrde jabyldy. Osy oraıda Parlament depýtattary kanıkýlǵa ketti.
Eske sala keteıik, bıyl 13 mamyrda Memleket basshysy jerdi sheteldikterge jeke menshikke jáne jalǵa berýge tyıym salatyn zańǵa qol qoıdy.
Sonymen qatar, 24 maýsymda Parlament jerge qatysty moratorııdi 5 jylǵa uzartý men jaıylym boıynsha zańdy qabyldady.
Ótken sessııa barysynda Parlament palatalarynyń úsh birlesken otyrysy, Májilistiń 23, al Senattyń 21 jalpy otyrysy ótkizildi.
Sessııa bastalǵan kezde qos palatanyń qaraýynda 104 zań jobasy boldy. Búginde onyń 63-i qabyldandy, sondaı-aq 58-ine Prezıdent qol qoıyp, kúshine endi.
