Depýtatty petıtsııa arqyly mandatynan aıyrý qalaı júrgiziledi: Mınıstr jaýaby

ASTANA. QazAqparat – QR Ádilet mınıstri Qanat Mýsın Úkimet otyrysynan keıin tilshilerge depýtatty mandatynan petıtsııa arqyly aıyrý rásimi qalaı iske asatynyn aıtyp berdi, dep habarlaıdy QazAqparat tilshisi.

«Depýtat halyqqa bergen ýádesin oryndamasa, mandatynan aıyrý qalaı júzege asady?», - dep surady BAQ ókili.

Mınıstr bul mehanızm depýtattyń mandatqa laıyqtyǵyn qaıta daýysqa salý arqyly iske asatynyn túsindirdi.

«Bul mehanızmniń tásili zańda kórsetilgen. Eger saılaýshylardyń saılanǵan depýtatynyń jasaǵan jumysyna kóńili tolmasa, petıtsııa arqyly sol depýtattyń mandatyn qaıtarý týraly másele kóterýge quqyqtary bar. Áýeli bastamashyl top sondaı másele kóterse, sol saılanǵan okrýgte qaıta daýys berý rásimi ótkiziledi. Saılaýshylardyń kóbi sondaı daýys berse, onda mandaty qaıtarylady», - dedi Ádilet mınıstri.