Depýtattyń orny bosasa, mandat sol partııada qalady – sarapshy
ASTANA. KAZINFORM – OSK janyndaǵy Saraptamalyq keńestiń altynshy otyrysynda jańa Konstıtýtsııa jaǵdaıyndaǵy saılaý zańnamasyn qoldaný máseleleri talqylandy. Keńes múshesi Indıra Áýbákirova jıynda depýtattyń ókilettigi merziminen buryn toqtatylǵan jaǵdaıda mandattyń qalaı bólinetinin túsindirdi.
Onyń aıtýynsha, mundaı jaǵdaıda qaıta saılaý ótkizilmeıdi. Depýtattyń ornyna partııalyq tizimdegi kelesi kandıdat keledi.
– Azamattar belgili bir saıası kúshke daýys beredi. Sondyqtan depýtattyń orny bosasa, mandat ta sol partııada qalady. Osylaısha saılaýshylardyń tańdaýy saqtalady, - dedi Indıra Áýbákirova.
Sarapshynyń sózinshe, osyǵan baılanysty partııalyq tizimniń róli de ózgeredi.
– Partııalyq tizim endi tek saılaý kúni ǵana qajet bolatyn qujat emes. Eger depýtat qandaı da bir sebeppen mandatynan aıyrylsa, onyń ornyna partııalyq tizimdegi kelesi kandıdat keledi. Partııa óz parlamenttik komandasy úshin tek saılaý kúni ǵana emes, búkil ókilettik merzimi boıy jaýap beredi, - dedi ol.
Jıynda sondaı-aq Quryltaı depýtattarynyń alǵashqy saılaýyn ótkizý tártibi, saılaýaldy úgitti quqyqtyq retteý, azamattardyń saılaý quqyqtaryn qamtamasyz etý jáne saılaýdy qarjylandyrý máseleleri de talqylandy.
