Depýtattarǵa hat joldaýdan astanalyqtar men almatylyqtar kósh bastap tur
ASTANA. 3 shilde. QazAqparat - Besinshi saılanǵan Qazaqstan Respýblıkasy Parlamenti Májilisi depýtattarynyń atyna úshinshi sessııa barysynda jeke jáne zańdy tulǵalar tarapynan kelip túsken ótinish pen aryz-shaǵymdardyń jalpy sany - 5593. Bul málimet Parlamenti Májilisi Apparatynyń jasaǵan qorytyndysynda kórinis tapqan.
Osy hattardyń mazmunyna nazar aýdarsaq, onyń basym bóliginde, ıaǵnı, 2797 aryz-shaǵymda áleýmettik máseleler kóterilgen. Sondaı-aq sot tóreligi jáne quqyqtyq tártip máseleleri - 1449 hatta, ekonomıkalyq reforma týraly oı-pikirler 584 hatta kórinis tapqan. Sonymen birge azamattar óz hattarynda densaýlyq saqtaý máselelerine (326), ǵylym jáne bilim berý máselelerine (253), ekologııa jáne tabıǵı resýrstardy utymdy paıdalaný máselelerine (99) depýtattardyń nazar aýdarýyn ótingen. Al zań jobalary boıynsha óz usynystaryn bergen 85 hat kelip túsken eken. Elimizdiń óńirlerine bólip qarasaq, ótinish bildirýde Astana men Almaty qalalary kósh bastap tur. Parlamentke astanalyqtar 1150 hat joldasa, almatylyqtar 1115 ótinish jibergen. Sonymen qatar Shyǵys Qazaqstan (579), Ońtústik Qazaqstan (422), Almaty (353) jáne Qaraǵandy (317) oblystarynyń turǵyndary kóptegen máseleni kóterip, hat joldaǵan. Al ózge óńirlerge qaraǵanda, Batys Qazaqstan (110), Pavlodar (120), Soltústik Qazaqstan (121), oblystary turǵyndarynyń belsendiligi tómen bolyp otyr. Aıta ketý kerek, hat-habarlar tek elimizdiń turǵyndarynan ǵana emes, TMD elderiniń azamattarynan da kelip túsken. Kórshi elderden barlyǵy 30 ótinish qabyldanǵan.
