Depýtattardyń bastamasy el taǵdyryna otanshyldyq turǵyda qamqorlyq tanytýdyń kórinisi - N.Nazarbaev
ASTANA. QazAqparat - Depýtattardyń bastamasy Qazaqstan men qazaqstandyqtardyń taǵdyryna otanshyldyq turǵyda qamqorlyq tanytýdyń kórinisi dep sanaımyn.
Búgin otandyq telearnalar arqyly depýtattardyń Májilis pen máslıhat saılaýyn merziminen buryn ótkizý bastamasyna oraı Qazaqstan halqyna úndeý arnaǵan Elbasy Nursultan Nazarbaev osylaı dedi.
«Qazir bizdiń qoǵamymyz baıaǵy 1991 jylǵy múldem beıtanys ahýalǵa tap bolǵan kezdegideı abdyraǵan adamdar toby emes. 24 jyldan astam ýaqyttan beri qaraı jumysymyzdy istep, táýelsizdikti nyǵaıtyp kele jatyrmyz. Shırek ǵasyrǵa jýyq abyroıly jolmen júrip kele jatqan elmiz. Biz jasampaz eńbekke shyńdalyp, tabysty qalyptasyp, álemge syıly memleket qurǵan birtutas halyqqa aınaldyq. Men depýtattardyń bastamasy Qazaqstan men qazaqstandyqtardyń taǵdyryna otanshyldyq turǵyda qamqorlyq tanytýdyń kórinisi dep sanaımyn. Májilistiń kezekten tys saılaýy, onyń ishinde Qazaqstan halqy Assambleıasy depýtattarynyń saılaýy bar jáne óńirlik máslıhattardyń kezekti saılaýy bar. Osy ekeýin qosyp ótkizý degen - ol ýaqytty da, qarjyny da únemdeý degen sóz. Menińshe durys oılastyrylyp otyrǵan másele», - dedi N.Nazarbaev.
