Depýtattardyń atyna 7 myńǵa jýyq hat keldi – Erlan Qoshanov
«Qoǵamdaǵy ózekti máseleler depýtattyq saýaldar arqyly da kóterilip keledi. Qos palata depýtattary memlekettik organdarǵa 306 depýtattyq saýal joldady. Onyń árqaısysynda eldegi túıtkildi jaıttar qozǵaldy. Ár óńirdiń, ár adamnyń, ár otbasynyń turmysyn jaqsartýǵa baǵyttalǵan mańyzdy máseleler kóterildi. Sonymen qatar depýtattardyń atyna turaqty túrde azamattardan ótinishter kelip túsip jatyr. Osy sessııanyń ózinde halyq qalaýlylarynyń atyna shamamen 7 myńǵa jýyq hat keldi. Tipti, aramyzda bir óziniń atyna júzdegen hat kelgen depýtattar da bar. Sondaı-aq depýtattar osy sessııada Májilis janyndaǵy Qoǵamdyq qabyldaýda 800-den astam adammen júzdesip, birqatar másele sol jerde sheshimin tapty», - dedi E. Qoshanov Parlament palatalarynyń birlesken otyrysynda.
Palata spıkeriniń paıymynsha, Parlament janynan qurylǵan dıalog alańdary da jaqsy nátıje berip otyr. Endi halyqty tolǵandyratyn barlyq zań jobalary Qoǵamdyq palata otyrystarynda táýelsiz sarapshylardyń, jurtshylyq ókilderiniń qatysýymen aldyn ala talqylanady.
««Jas sarapshylar klýby» men «Taldaý mektebi» jas mamandarǵa zań shyǵarý protsesine aralasýǵa múmkindik berdi. Sondaı-aq «Ulttyq múdde» jobasy parlamentarıılerdi, zııaly qaýym men sarapshylar qoǵamdastyǵyn biriktiretin alańǵa aınaldy. Parlament qabyrǵasynda Qazaqstannyń ornyqty damýy salasyndaǵy maqsattardyń iske asyrylýy jónindegi parlamenttik komıssııa quryldy. Sonymen qatar Memleket basshysynyń bastamasymen jasaqtalǵan «Bir el – bir múdde» depýtattyq toby jumysyn bastady. Bul toptyń negizgi maqsaty – ult birligin nyǵaıtý. Budan bólek, taıaýda «Inklıýzıvti Parlament» depýtattyq toby óz mindetin atqarýǵa kirisetin bolady», - dedi Májilis tóraǵasy.
Onyń sózine qaraǵanda, taǵy bir mańyzdy baǵyt – Parlamenttik dıplomatııany damytý. Bul salada 100-den astam eldiń parlamentterimen yntymaqtastyq toptar quryldy. Depýtattar TúrkPA, TMD, Ujymdyq qaýipsizdik sharty uıymy jáne Eýropadaǵy qaýipsizdik pen yntymaqtastyq uıymy Parlamenttik Assambleıalary, Parlamentaralyq Odaq jáne Eýropalyq Parlament is-sharalaryna qatysty. Belgııa, Grýzııa, Qyrǵyzstan, Lıtva, Mońǵolııa, Tájikstan jáne Túrikmenstan parlamenttik delegatsııalary Qazaqstanǵa keldi. Budan bólek, jýyrda Qazaqstannyń tóraǵalyq etýimen Ortalyq Azııa elderi áıelderiniń dıalogy forýmy uıymdastyryldy.
Budan buryn habarlanǵandaı, búgin Májilis pen Senattyń birlesken otyrysy ótip, onda segizinshi saılanǵan Parlamenttiń birinshi sessııasy resmı túrde jabyldy.
Depýtattar bıylǵy 1 qyrkúıekke deıin parlamenttik kanıkýl dep jarııalanatyny týraly arnaıy qaýly qabyldady.
