Depýtattardyń jaýapkershiligi artady – QSZI basshysy Quryltaı jumysy týraly
ASTANA. KAZINFORM – QR Prezıdenti janyndaǵy Qazaqstannyń strategııalyq zertteýler ınstıtýty dırektory Jandos Shaımardanov jańa Quryltaıda qabyldanatyn zańdardyń sapasy jóninde pikir bildirdi.
Onyń aıtýynsha, eki palataly Parlamentten bir palataly zań shyǵarýshy organǵa kóshý zańdardy qabyldaý barysynda depýtattardyń jaýapkershiligin kúsheıtedi. Endi olar zań jobalaryn eki emes, úsh oqylymda qaraıdy.
– Eń aldymen, bul depýtattardyń kózqarasy men jaýapkershiligin ózgertedi. Parlamentimiz eki palatadan turǵan kezde Májilis zań jobalaryn qarap, olardy ózi de bastamashylyqpen engize alatyn. Al Senat Májilis qabyldaǵan túzetýlerdi maquldaıtyn. Árıne, ol qujattardy Májiliske qaıtara alatyn, biraq mundaı jaǵdaı jıi bola bermeıtin. Al bir palataly parlament jaǵdaıynda qujattardy qaraıtyn Quryltaı men depýtattardyń jaýapkershiligi artady, – dep túsindirdi ol.
QSZI basshysy bul pikirin «Saılaý – 2026: qorytyndy jáne jańa saıası beles» atty saraptamalyq alańnyń kýlýarynda málimdedi.
Sonymen qatar, Quryltaıda beıindi komıtetterdiń sany artady. Bul depýtattardyń jumys baǵyttaryn júıelep, bólýge múmkindik beredi. Jańa komıtetterdiń biri tsıfrlandyrý jáne jasandy ıntellekt máselelerimen aınalysady.
Aıta keteıik, buǵan deıin Májiliste jeti, al Senatta alty komıtet bolǵan.
– Depýtattar zań shyǵarý protsesine belsendi túrde qatysady. Olarǵa jaýapkershilik júkteletin naqty sala belgilenedi, komıtetterdiń sany artady. Bul da oń áserin tıgizedi, óıtkeni jumys baǵyttary burynǵydan naqtyraq bólinedi. Bıyl bizde tsıfrlandyrý jáne jasandy ıntellekt jyly bolyp jarııalandy. Osy baǵytta jumys isteıtin arnaıy mamandandyrylǵan komıtet qurylady dep oılaımyz, – dedi Jandos Shaımardanov.
Aıta keteıik, buǵan deıin QSZI basshysy Quryltaı saılaýy týraly «Saıası básekelestik artty» dep málimdegenin jazǵanbyz.
