Depýtattar zııatkerlik menshik máselelerine qatysty zań jobasyn talqyǵa saldy
ASTANA. 14 maýsym. QazAqparat - Búgin Májilistiń Zańnama jáne sot-quqyqtyq reforma komıtetiniń tóraǵasy Rahmet Muqashevtyń jetekshiligimen osy komıtettiń keńeıtilgen otyrysy ótti.
Búgingi basqosýda birqatar zań jobalary talqyǵa salyndy. Sonyń ishinde «Qazaqstan Respýblıkasynyń keıbir zańnamalyq aktilerine zııatkerlik menshik máseleleri boıynsha ózgerister men tolyqtyrýlar engizý týraly» Qazaqstan Respýblıkasy Zańynyń jobasyn qarady.
Kirispe sózinde Rahmet Muqashev atalǵan zań jobasynyń mańyzdylyǵyna toqtaldy jáne otyrysqa kelgen mınıstrlik ókilderin tanystyrdy.
Jumys tobynyń jetekshisi Zaǵıpa Bálıeva atalǵan zań jobasy Májiliske 2011 jyly 24 qańtarda kelip túskenin habarlady. Depýtat zań jobasynda Qazaqstan Respýblıkasynyń Azamattyq kodeksi, «Avtorlyq quqyq jáne sabaqtas quqyqtar týraly», «Selektsııalyq jetistikterdi qorǵaý týraly», «Patent zańy», «Taýar tańbalary, qyzmet kórsetý tańbalary jáne taýar shyǵarylǵan jerlerdiń ataýlary týraly», «Integraldyq mıkroshemalar topologııalaryn quqyqtyq qorǵaý týraly», «Mádenıet týraly» zańdary sııaqty zııatkerlik menshik quqyǵy máselelerin retteıtin Qazaqstan Respýblıkasynyń qoldanystaǵy zańnamalyq aktilerine ózgerister men tolyqtyrýlar engizý kózdelip otyrǵanyn aıtty.
Qazaqstan Respýblıkasynyń Azamattyq kodeksine engizilip otyrǵan ózgerister ár túrli taýarlardy, jumystardy jáne qyzmetterdi daralandyrý quraldarynyń tirkeý basymdyǵyn zańnamalyq deńgeıde retteýge baǵyttalǵan, óıtkeni qazirgi tańda bir-birine uqsas nemese aralasyp ketken dárejege deıin birdeı taýar tańbalary men fırmalyq ataýlardy tirkeý barysynda máseleler týyndaıdy. Budan basqa, zań jobasyna sáıkes kez kelgen múddeli tulǵa ýákiletti organǵa taýar tańbalaryn paıdalanylmaýyna baılanysty ony jaramsyz dep taný týraly qarsylyq berýge quqyly bolyp tabylatyn taýar tańbalaryn paıdalanbaý máseleleri boıynsha zańnamalyq aktilerdiń normalaryn birdeı qoldaný kózdelip otyr.
Zań jobasy jóninde osy otyrysta Ádilet mınıstriniń orynbasary Ámirhan Amanbaev baıandama jasap, depýtattardyń suraqtaryna jaýap berdi.
Zań jobasynda kózdelgen ózge de zańnamalyq aktilerge túzetýler ishki qarama-qaıshylyqtardy joıýǵa, patenttik senim bildirilgen ókilderdiń mártebesin zańnamalyq turǵydan bekitýge, sondaı-aq ónerkásiptik menshik obektilerine ótinimderdi qaraý merzimderin qysqartýǵa baǵyttalǵan.
Qazaqstan Respýblıkasynyń Dúnıejúzilik saýda uıymyna (DSU) kirýi sharttarynyń biri ulttyq zańnamanyń normalaryn DSU sheńberinde jasalǵan Zııatkerlik menshiktiń saýda aspektileri boıynsha kelisimniń talaptaryna sáıkes keltirý bolyp tabylady.
Osyǵan baılanysty «Taýar tańbalary, qyzmet kórsetý tańbalary jáne taýar shyǵarylǵan jerlerdiń ataýlary týraly» Zańǵa engizilip otyrǵan ózgerister men tolyqtyrýlar taýar tańbalary men geografııalyq kórsetkishterdi tirkeý basymdyǵyn retteıtin normalardy jetildirýge jáne zańnamany halyqaralyq quqyq normalarymen úılestirýge baǵyttalǵan.
Zańnama jáne sot-quqyqtyq reforma komıteti bul zań jobasyn Parlament Májilisiniń qaraýyna engizedi.
