Depýtattar joldardaǵy kóliktik baqylaýdy qysqartýdy usyndy
ASTANA. QazAqparat - Kóliktik baqylaý qyzmetin qysqartý kerek. Bul týraly Parlament Májilisindegi «Nur Otan» fraktsııasy janyndaǵy kóliktik-logıstıkalyq ınfraqurylymdy damytý jónindegi komıssııanyń otyrysynda depýtat Sáken Ótebaev málim etti, dep habarlaıdy QazAqparat.
«Kóliktik baqylaýdy sybaılas jemqorlyq táýekeli joǵary qyzmet retinde múmkin qysqartý kerek shyǵar nemese ony mamandandyrylǵan organnyń qaramaǵyna bergen jón bolar. Osy oraıda kóliktik baqylaýdy memlekettik kiris, ne bolmasa jol polıtsııasyna aýystyrǵan durys shyǵar. Bul usynysty Úkimettiń qaraýyna jiberip, talqylaý kerek. Atap aıtqanda, búginde mınıstrlik (Investıtsııalar jáne damý mınıstrligi) joldardy ózderi salady, ony ózderi qadaǵalaıdy. Joldardyń sapasyz salynýyna múmkin olar múddeli shyǵar, sebebi 99 mlrd teńge jyl saıyn joldardy qaıta salý men jóndeýge bólinedi. Nege? Óıtkeni kóliktik baqylaý jumys istemeıdi», - dep toqtaldy S. Ótebaev.
Onyń paıymynsha, joldyń sapasynyń nasharlaýy úrdisi qarqyndy, bul turǵyda kóliktik baqylaý qyzmeti ózderiniń jumysyn laıyqty deńgeıde atqarmaı otyr.
«Osyǵan baılanysty atalǵan usynystardy mindetti túrde jetkizý kerek. Tıisti qadaǵalaý bolmasa, onda bizdiń jumystan eshqandaı nátıje shyqpaıdy», - dedi depýtat komıssııa otyrysynda.
Óz kezeginde depýtat Beıbit Mamraev joldarǵa shamadan tys salmaq túsiretin óte aýyr júk kólikterin elimizdiń aýmaǵyna kirgizbeý kerektigin alǵa tartty.
«Standarttar boıynsha atalǵan aýyr kólikterdiń salmaǵyn joldar kótermeıdi. Sondyqtan osy júk kólikterin el aýmaǵyna kirgizýge tyıym salý kerek bolar. Osyǵan deıin oń rýldi jeńil kólikterdi Qazaqstanǵa alyp kirýge tyıym saldyq qoı, endi bul máselede de tıisti sheshim qabyldaý kerek», - B. Mamraev.
Budan buryn habarlanǵandaı, jaqynda Almaty oblysynda óńirlik kóliktik baqylaý ınspektsııasy basshysynyń orynbasary basqarǵan uıymdasqan qylmystyq toptyń qyzmeti áshkerelendi.
