Depýtattar joldarda qosymsha jyldamdyqty baqylaý quraldaryn ornatýdy surady
«Mektep oqýshylary men stýdentter arasyndaǵy zertteý olardyń tek 41,2 paıyzy jol júrý erejelerimen tanys ekendigin, 34,2 paıyzy erejelerdiń keıbir tarmaqtaryn ǵana biletinin, 10,4 paıyzy nashar biletinin, 8,8 paıyzy tipti bilmeıtinin kórsetti. Al 5,4 paıyzy múldem jaýap bermegen», - dedi ol búgin jarııalaǵan depýtattyq saýalynda.
«Qaýipsizdikke áser etetin taǵy bir faktordy qarastyraıyq. Ol jol ınfraqurylymynyń jaǵdaıy. Jol ınfraqurylymyn damytý boıynsha keshendi sharalar qabyldaý apattylyqty, jaraqattanýdy jáne ólim-jitimdi tómendetýge múmkindik beredi.
Búgingi tańda Qazaqstanda respýblıkalyq mańyzy bar 25 myń shaqyrymǵa jýyq jol bar, onyń 4 ýchaskesi aqyly (uzyndyǵy 682 shaqyrym). 2021 jyly taǵy 18 jol aqyly bolady, al 2024 jylǵa deıin onyń uzyndyǵyn 11 myń shaqyrymǵa deıin jetkizý josparlanyp otyr. Árıne, aqyly joldar jol boıyndaǵy qyzmet kórsetý, jaqsy jol jamylǵysy, ýaqtyly tazartý jáne basqa da artyqshylyqtardy usynady», - dep toqtaldy S. Reshetnıkov.
Osy oraıda ol birneshe usynystaryn jarııa etti.
«Azamattardyń quqyqtyq sanasy men quqyqtyq mádenıetin arttyrý, olardy jol qozǵalysy erejelerin múltiksiz saqtaý rýhynda tárbıeleý boıynsha memlekettik jáne qoǵamdyq organdardyń, kásiporyndar men uıymdardyń belsendi jáne maqsatty jumysyn jalǵastyrý kerek. Avarııalyq jáne jol qyzmetteriniń jumysyn jetildirý, zardap shekkenderge medıtsınalyq kómektiń sapasy men jedeldigin arttyrý - bul jol-kólik oqıǵalarynda aman qalǵandardyń múgedektigi men zardap shegý yqtımaldyǵyn azaıtady», - dedi depýtat.
Onyń paıymynsha, jol qozǵalysy qaýipsizdiginiń aldyn alý jáne deńgeıin arttyrý maqsatynda avtomobıl joldarynyń asa apatty ýchaskelerinde jaryqtandyrý jáne jyldamdyqty baqylaý quraldaryn ornatý kerek. Aýdandyq jáne oblystyq mańyzy bar joldarǵa erekshe nazar aýdarylýy qajet. Eldi mekenderde jaıaý júrginshilerdiń qatysýymen bolatyn jol-kólik oqıǵalaryn tómendetý úshin jerústi jáne jerasty jaıaý júrginshiler ótkelderiniń sanyn ulǵaıtý mańyzdy.
Budan buryn habarlanǵandaı, S. Reshetnıkov Májiliste avtomobıl joldaryndaǵy qaýipsizdikti qamtamasyz etý máselesin kóterdi.