Depýtattar joǵary bilim týraly 457 jalǵan dıplomdy anyqtady

ASTANA. KAZINFORM – Jibek Joly telearnasy «Fokýs vnımanııa» baǵdarlamasynyń tikeleı efırinde joǵary bilim týraly dıplomnyń qara naryǵyndaǵy ózekti máseleler talqylandy.

«Joǵary bilim týraly jalǵan dıplomnyń 457 faktisi anyqtaldy. Jan-jaqty qarastyrǵan kezde kóp jaǵdaıda olardyń pedagogter men dárigerler ekendigin kórdik. Pavlodar oblysynda 80 faktiniń tirkelgenin anyqtadyq. Mańǵystaý, Soltústik Qazaqstan oblystarynda da derekter bar. Máseleni odan ary tereńdeı zertteý barysynda Ǵylym jáne joǵary bilim mınıstrliginde dıplomnyń túpnusqa ekendigin anyqtaıtyn arnaýly saıt jumys isteýi tıistigin baıqadyq. Alaıda ol jumys istemeı tur. Osy jaıttan keıin depýtattyq saýal týyndady. Biz Ǵylym mınıstrligi jumysty jedeldetip, dıplomdardy tekserýge qatysty barlyq derekterdi engizýin, al Іshki ister mınıstrligi saıttardy buǵattaý jumystaryn júrgizýin surap otyrmyz. Óıtkeni, olar ashyq satylyp jatyr. Olar qujattyń túpnusqa bolatyndyǵyna, tipti dıplomdy tabystaý is-sharasyna kelip, alýǵa bolatynyn aıtyp sendiredi. Munan bólek, aldyn alý jumystaryn júrgizgimiz keledi. Qylmystyq jaýapkershilik bar – 7 mln teńge mólsherinde aıyppul nemese 4 jylǵa deıin bas bostandyǵyn aıyrý», - dedi Májilis depýtaty Islam Suńqar.

Onyń atap ótýinshe, másele óte ózekti bolyp otyr. Sebebi túptep kelgende qyzmet alýshy, ıaǵnı osyndaı biliksiz mamandardan qyzmet alǵandar zardap shegedi.