Depýtattar jer qoınaýyn paıdalaný týraly zań jobasyna 1 myń 700-den astam usynys jasady
ASTANA. Qańtardyń 26-sy. QazAqparat /Qanat Mámetqazyuly/ - Búgin QR Parlamenti Májilisi Ekologııa máseleleri jáne tabıǵat paıdalaný komıtetiniń qaraýynda jatqan «Jer qoınaýy men jer qoınaýyn paıdalaný týraly» zań jobasyna depýtattar tarapynan 1 myń 700-den astam usynystar túsken.
Bul týraly búgin atalǵan zań jobasyn talqylaý barysynda Energetıka jáne mıneraldyq resýrstar mınıstri Saýat Myńbaev málim etti, dep habarlaıdy QazAqparat.
«Zań jobasynda Úkimettiń, sondaı-aq quziretti organnyń jer qoınaýyn paıdalaný salasyndaǵy ózge de memlekettik organdardyń fýnktsııalary naqtylanyp otyr. Sonymen birge, memlekettiń basymdyqtaryn júzege asyrý jónindegi vedomstvoaralyq komıssııanyń paıdaly qazbalar qorlaryn saraptaý komıssııasynyń, jer qoınaýyn paıdalaný quqyǵyn beretin komıssııanyń qyzmetteri tolyq reglamentteldi. Bul komıssııalar búgingi kúni naqty is júzinde qyzmet etip otyrǵanymen de, qoldanystaǵy zańnamada olar qarastyrylmaǵan. Úshinshiden, alǵash ret osy salada jobalyq qujattardyń mańyzdy róli ornyqty qamtyldy. Bul budan bylaı jer qoınaýyn paıdalanýǵa arnalǵan kelisimsharttyń erejelerin ázirleý úshin negizgi qujat retinde qaralatyn bolady. Onyń ústine, óndirýge arnalǵan jobalar úshin jobalaý uıymynyń tarapynan mańyzdy tártipke keltirýshi faktor retinde qadaǵalaý da engizildi. Sondaı-aq, zań jobasynda quziretti organnyń quqyq berýge ruqsaty qajet bolmaǵan jaǵdaıda jer qoınaýyn paıdalanýǵa qatysty jańa normalar engizildi. Budan basqa, zań jobasy konkýrstyq usynysty eki topqa bólýdi boljaıdy, onyń biri - eń az qajetti talaptar tizbesi, ekinshisi - jeńimpazdy anyqtaý ólshemderi. Bul qurylym rásimderdiń ashyqtyǵyn qamtamasyz etýge jáne bıýdjettik tólemderdiń eń joǵary shekke jetkizýge múmkindik beredi», dedi S. Myńbaev.
Mınıstrdiń aıtýynsha, bastapqyda zań jobasynda ken oryndaryn barlaý men óndirýge arnalǵan bólek kelisimsharttar kózdelgen. Bul máselege qatysty depýtattardyń alańdaýshylyǵyn Úkimet túsinikpen qarap, barlaý men óndirý týraly norma operatsııa túri retinde qalpyna keltirilgen. Sonymen birge, qujatta jer qoınaýyn paıdalanýshylarǵa qazaqstandyq qamtý boıynsha qoıylatyn talaptar da anyqtalǵan.
«Zań jobasymen jumys barysynda depýtattar tarapynan 1 myń 700-den astam usynystar kelip tústi. Bulardyń 650-den astamy salystyrmaly kestege qabyldandy», dedi mınıstr.
