Depýtattar jeke qosalqy sharýashylyq zań jobasyn mınıstrlikke pysyqtaýǵa qaıtarýdy usyndy
«Zań jobasyn túzetý úshin vedomstvoǵa qaıtarýymyz kerek. Aýyl sharýashylyǵy mınıstrligi jeke qosalqy sharýashylyǵyn memlekettik retteýdegi úlken quqyqtyq vakýýmdy jabýǵa tyrysqan. Halqymyzdyń 42 paıyzy aýyldy jerde turatynyn, zań jobasy turǵyndardyń áleýmettik-quqyqtyq ári eń sezimtal qatynastaryna qatysty bolatynyn eskergen jón... Osy oraıda men Májilistiń Zańnama jáne sot-quqyqtyq reforma komıteti músheleriniń pikirin jetkizip otyrmyn. Búgin qoıylǵan suraqtarǵa qanaǵattanarlyq jaýaptar bolmady dep sanaımyn. Bul zań jobasy shıki ekeni týraly sheshim qabyldaý kerek. Aldaǵy ýaqytta óńirlerge osy zań jobasyn túsindirý úshin bara almaımyz. Sebebi qazir bizdiń tarapymyzdan mınıstrlikke osynshama suraq qoıǵanymyzdy kórip otyrsyzdar. Erteń biz óńirlerdegi kezdesý kezinde turǵyndar bireneshe ese kóp saýal jaýdyratynyn bilemiz» - dedi depýtat Gúlnar Bıjanova.
Osy oraıda ol Májilistiń Zańnama jáne sot-quqyqtyq reforma komıteti eskertpelerin nazarǵa ala otyryp, zań jobasyn qaıta pysyqtaýǵa jiberýdi usyndy.
Óz kezeginde Agrarlyq máseleler komıtetiniń múshesi, depýtat Asqarbek Úısimbaev zań jobasy jeke qosalqy sharýashylyqtardyń qyzmetin retteý jáne olardy damytý máselerin sheshýge múmkindikter beretin naqty tetikterdi kórsetpeı otyrǵanyn jetkizdi.
«Osy sektordyń máselelerin sheshýge múmkindik beretin naqty normalar qajet... Tutastaı alǵanda, usynystardy eskere otyryp, zań jobasyn memlekettik retteýshi rólin kúsheıte otyryp pysyqtaý jáne memleket tarapynan qoldaý is-sharalaryn kúsheıtý qajet dep sanaımyz», - dedi A. Úısimbaev.
Budan buryn habarlanǵandaı, búgin Parlament Májilisinde Aýyl sharýashylyǵy mınıstri Erbol Qarashókeev «Jeke qosalqy sharýashylyq týraly» zań jobasyn tanystyrdy.
