Depýtattar jastardy baspanamen qamtamasyz etý boıynsha usynystar aıtty
«Elbasynyń tapsyrmasyna sáıkes ótken Jastar jylynda jumys isteıtin jastarǵa 3 myń páter satyp alý quqyǵynsyz jalǵa berilgeni málim. Nur-Sultan, Almaty jáne Shymkent qalalarynda iske asyrylǵan osy baǵdarlama iri megapolısterde eńbek etip júrgen jas otbasylar men jalǵyzbasty jastarymyzdyń baspana máselesin sheshýine ońtaıly múmkindik berdi. Sonymen qatar, atalǵan baǵdarlamany aldaǵy ýaqytta júzege asyrý kezinde eskeretin keıbir ózekti máselelerge nazar aýdarǵymyz keledi. Birinshiden, Aqparat jáne qoǵamdyq damý mınıstrliginiń 2019 jylǵy 29 tamyzdaǵy buıryǵymen bekitilgen «Jumys istep júrgen jastarǵa satyp alý quqyǵynsyz jalǵa beriletin turǵynjaı berý qaǵıdalaryna» sáıkes, baǵdarlamaǵa qatysýshydan keminde 40 aılyq eseptik kórsetkish mólsherinde tólem qabilettiligin rastaý talap etiledi. Bul talapty oryndaý bıyl qıyndaǵany anyq. Óıtkeni, onyń somasy ótken jyly 101 myń teńgeni quraǵan bolsa, ústimizdegi jyly 111 myń teńgeden asty», - dedi depýtat Káribaı Musyrman.
Jyl saıyn aılyq eseptik kórsetkishtiń mólsheri arttyrylýyna baılanysty bul soma odan ári óse bermek. Osyǵan oraı baǵdarlamaǵa qatysqysy keletin jastardyń tarapynan atalǵan qaǵıdalarǵa ózgeris engizip, jas otbasy músheleriniń, ıaǵnı erli-zaıyptylardyń ekeýiniń jıyntyq tabysyn esepke alý jóninde ótinishter aıtylýda.
«Ekinshiden, baǵdarlama boıynsha Eńbek jáne halyqty áleýmettik qorǵaý mınıstrligi aıqyndaǵan 100 suranysqa ıe mamandyǵy bar jastarǵa basymdyq beriledi. Atap aıtqanda, sondaı mamandyqtardyń birine ıe jas jumyskerge 10 ball qosylady. Mundaı artyqshylyqqa búgingi tańda óte qajet IT-mamandar, ınjenerler, sáýletshiler, jobalaýshylar jáne dızaınerler ıe. Sondaı-aq olardyń qataryna betonshylar, sylaqshylar, aǵash ustalary, tas qalaýshylar, santehnıkter, slesarlar, traktorshylar, kombaınshylar, tiginshiler, elektrshiler, dánekerleýshiler sııaqty mamandyqtardyń ıeleri de qosylǵan. Alaıda, mundaı artyqshylyq qazir qaı qala men óńirde bolsyn jetispeı otyrǵan jas dárigerler men meıirgerlerge, muǵalimder men oqytýshylarǵa, mádenıet pen sport qyzmetkerlerine, ǵalymdar men jýrnalısterge berilmegen bolyp shyqty», - dedi K. Musyrman.
Osy oraıda ol atalǵan baǵdarlama boıynsha basymdyq beriletin 100 suranysqa ıe mamandyq tizbesin keńeıtip, oǵan densaýlyq saqtaý, bilim berý, mádenıet jáne sport salalarynyń jas mamandaryn, sondaı-aq jas ǵalymdar men jýrnalısterdi engizý máselesin qarastyrý qajet ekenin aıtty.
«Almaty qalasy ákimdiginiń bastamasymen qolǵa alynǵan «Almaty jastary 3.0» jańa turǵyn úı baǵdarlamasyna qoldaý bildirip, ony basqa qalalar men oblystarda taratý múmkindigin qarastyrǵan jón», - dedi depýtat.
