Depýtattar jańa jyldan keıin halyqpen kezdesedi
ASTANA. QazAqparat - Májilis depýtattary jańa jyldaǵy jumystaryn óńirlerde saılaýshylarmen kezdesýden bastaıdy. Bul jaıynda búgin tómengi palatynyń aǵymdaǵy jylǵy sońǵy jalpy otyrysyn qorytyndylaǵan Májilis Tóraǵasy Nurlan Nyǵmatýlın aıtty, dep habarlaıdy QazAqparat.
«Jańa 2018 jyl kele jatyr. Ózderińiz jaqsy bilesizder, bizdiń jańa jyldaǵy jumysymyz árqashanda saılaýshylarmen kezdesýden bastalady. Bul halqymyz úshin, biz úshin de óte qajetti, mańyzdy sharalar. Sebebi Elbasymyz bizge árqashanda halyqpen tikeleı jumys jasap, elimizdiń jańǵyrtý maqsattaryn túsindirý týraly naqty tapsyrmalar berdi. Sondyqtan árbir aýylǵa, árbir qalaǵa barlyq bastamalardy jáne olardyń zań jaǵynan qoldaý jumystaryn jetkizý basty mindetimiz. Sol úshin Májilis bıýrosynyń arnaıy sheshimi qabyldanyp, depýtattardyń aımaqtarǵa sapary josparlanyp otyr», - dedi Nurlan Nyǵmatýllın.
Onyń aıtýynsha, bıýro sheshimine sáıkes depýtattar 2018 jyldyń 3-12 qańtary aralyǵynda óńirlerde bolyp, saılaýshylarmen kezdesýler ótkizedi. Sonymen qatar Májilis Tóraǵasy Parlamenttiń osy sessııasynda atqarylǵan jumystarǵa toqtaldy.
«Parlamenttiń osy sessııasy bastalǵannan beri Májilis 80 zań jobasyn jumysqa alyp, onyń 42-si qaralyp, maquldandy. Taǵy 12 zań jobasyn Májilis depýtattarynyń ózderi ázirledi. Parlament qabyldaǵan zań jobalarynyń 27-sine búginde Memleket basshysy qol qoıyp, zańdyq kúshine endi», - dedi Májilis spıkeri.
