Depýtattar jaǵdaı túzelgenshe sý tasqynynan zardap shekken aımaqtarda bolady
ASTANA. KAZINFORM - Eldiń soltústik jáne batys óńirlerindegi eldi mekenderge tasqyn sýdyń kelýi tolastamaı tur. Sondyqtan Májilis depýtattary jaǵdaıdy baqylaý úshin aımaqtarda júr. Olar apatqa qarsy jumystardy uıymdastyrýǵa kómektesip, zardap shekken turǵyndarǵa memlekettik qoldaý sharalaryn túsindirip jatyr.
Qostanaı oblysynda júrgen depýtat Ekaterına Smyshlıaeva jergilikti vedomstvo ókilderimen jáne sý tasqynynan zardap shekken Altynsarın men Mıchýrıno aýyldarynyń turǵyndarymen kezdesti. Altynsarında 141 úıdi, Mıchýrınoda 34 úıdi sý shaıyp ketken.
– Qazir eń bastysy – azamattardyń qaýipsizdigin qamtamasyz etý jáne materıaldyq shyǵyndy barynsha azaıtý. Komıssııa músheleri úılerdiń jaǵdaıyn baǵalaý úshin aýdan ákimdigimen birlesip jumys isteımiz. Ahýal tolyq turaqtalǵansha biz osynda bolyp, baqylaýda ustaımyz, – dedi Ekaterına Smyshlıaeva.
Sondaı-aq depýtat zardap shekken turǵyndarǵa kórsetiletin memlekettik qoldaý sharalary, qarjylaı kómek alý, ótemaqy tóleý protsedýralary jáne basqa da jaıttar týraly túsindirdi. Jıynda gýmanıtarlyq kómek, sonyń ishinde azyq-túlik, kıim-keshek pen qajetti zattar taratyldy.
Májilis depýtattary Qazybek Álishev, Amanjol Áltaı jáne Asqar Sadyqov Aqtóbe oblysynda jumysyn jalǵastyryp, sý tasqynynan eń kóp zardap shekken Oıyl aýdanynyń turǵyndarymen kezdesti.
Qazir Oıyl aýylyna baratyn joldyń sý shaıǵan bóligi jóndelip, kólikter óte bastady. Depýtattar jergilikti atqarýshy organdarǵa kópirdi qalpyna keltirýdi jedeldetý kerektigine nazar aýdardy.
Óz kezeginde, halyq baspana jaıyna alańdaýly. Qazir úıi sýǵa ketken turǵyndarǵa ýaqytsha qonystanýy úshin áskerı palatka tigilip, aǵash úıler turǵyzýǵa aýdandyq bıýdjetten qarjy bólingen.
Depýtattar Aına Mysyrálimova, Gaýhar Tanasheva jáne Dáýlet Muqaev Aqmola oblysynyń birneshe aýdanynda boldy.
Atbasar qalasynda Jabaı ózeniniń deńgeıi artyp, 4,5 metrdi qurap otyr. Qosymsha bógetter salý jáne nyǵaıtý jumystary júrgizilýde.
Oǵan ákimdikterdiń, Aqmola jáne Jambyl oblystarynyń Tótenshe jaǵdaılar departamentiniń kúshteri, kýrsanttar, áskerı qyzmetshiler men eriktiler jumyldyryldy. 123 adam qaýipsiz jerge kóshirildi.
Esil jáne Qyzyl sý ózeninderingi sý deńgeıiniń kóterilýinen Esil aýdanyndaǵy eldi mekenderdi sý basý qaýpi týyndap otyr. Osyǵan baılanysty sońǵy táýlikte qutqarýshylar Lenınskoe, Igilik jáne Svobodnoe aýyldarynan 461 adamdy qaýipsiz jerge kóshirdi. Qazirgi ýaqytta sý tasqynyna qarsy is-sharalar jalǵasýda.
Sondaı-aq depýtattar Erkebulan Mámbetov, Dmıtrıı Koloda jáne Baqytjan Bazarbek Soltústik Qazaqstan oblysynyń ortalyǵy – Petropavl qalasynyń apatqa tótep berý daıyndyǵymen tanysty. Onda osy aptada sý tasqynynyń sharyqtaý shegi bolýy múmkin. Sý qalaǵa Sergeev bógeninen kele jatyr. Jol boıyndaǵy eldi mekenderden, sonyń ishinde Pokrovka men Novonıkolskoe aýyldarynan ótti.
– Basty mindet – qaýipsizdik. Turǵyndar men aýyldyq okrýg ákimderiniń buǵan jetkilikti mán bermegenin baıqap otyrmyz. Sý deńgeıi óte úlken. Turǵyndarda múlik shyǵyndaryn óteýge qatysty kúmán bar. Sondyqtan biz osynda júrmiz. Sý tasqynan zardap shekken turǵyndardyń barlyǵyna tólem beriletinin túsindirip jatyrmyz, – dedi Erkebulan Mámbetov.
Qazir Podgora shaǵyn aýdanyndaǵy bógetti nyǵaıtý jumystary qarqyndy júrip jatyr. Zarechnyı aýylynda polıtsııa men tótenshe jaǵdaılar qyzmeti turǵyndardy sý basqan aımaqtan evakýatsııalaýda, biraq 47 adam úıinen ketýden bas tartty.
Depýtattar olarǵa jaǵdaıdy túsindirdi. Dán osy kúni Petropavl sý torabynyń jaǵdaımen tanysyp, Kojevennyı kentindegi bógetti de aralady.
Depýtat Azat Perýashev ta qazir osy oblysta júr. Búgin ol Esil ózeniniń shyǵys jaǵalaýyn qarap shyqty. Munda aldaǵy birneshe saǵatta sý deńgeıi kóteriledi dep boljanyp otyr.
Májilismen sondaı-aq Teplıchnoe aýylynyń turǵyndarymen kezdesip, qutqarý jumystaryna qajet rezeńke qaıyqtar men arnaıy kıimder tabystady. Alda sý tasqyny aımaǵynda ornalasqan basqa da eldi mekender de qamtylady.
