Depýtattar J. Dosqalıevke ýaqtyly medıtsınalyq járdem kórsetilmegenine alańdaýshylyq bildirdi
ASTANA. Qyrkúıektiń 29-y. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda bir top depýtattar Bas prokýror Qaırat Mámıdiń atyna saýal joldady. Onda depýattar eks-mınıstr Jaqsylyq Dosqalıevtiń densaýlyǵynyń nasharlaýyna ýaqtyly kómek kórsetilmeýine qatysty alańdaýshylyqtaryn bildirdi.
«Qyrkúıektiń 25-inde aqparat quraldarynda Densaýlyq saqtaý mınıstri J. Dosqalıevke qatysty qyzmettik ókilettigin asyra paıdalanǵany týraly qylmystyq is qozǵalǵany jóninde habar tarady. Qyrkúıektiń 27-sindegi taǵy bir habarda J. Dosqalıevti Qarjy polıtsııasynyń suraq alyp tergeýi kezinde ıaǵnı, qyrkúıektiń 25-i kúni ınsýlt alǵany belgili bolǵan. Alaıda tek qyrkúıektiń 26-synda ǵana saǵat 15.40-ta ol Ulttyq medıtsınalyq ortalyqqa aýyr halde jetkizilgen. Biz ýaqtyly medıtsınalyq kómek kórsetilse, mundaı saldar bolmaýshy edi dep esepteımiz», dedi depýtattar atynan saýaldy jarııalaǵan M. Iteǵulov.
Sonymen birge depýtat J. Dosqalıevtiń joǵary deńgeıdegi bilikti hırýrg ekendigin, qandaı qyzmet atqarsa da hırýrgtik tájirıbesinen qol úzbegendigin aıtyp, dáriger retinde kóptegen azamattardyń ómirin saqtap qalǵanyn eske saldy. «J. Dosqalıevke degen qarym-qatynas ta, kózqaras ta basqasha bolýy tıis. Bizdiń elimizde ol sekildi joǵary bilikti mamandar kóp emes. Sonymen birge densaýlyǵy myqty azamattyń nege osynshalyqty aýyr jaǵdaıǵa jetkendigi bizdi alańdatady. Oǵan nege ýaqtyly medıtsınalyq kómek kórsetilmegen. Osy jaıtty tekserýińizdi suraımyz», dedi depýtat.
Saýalǵa birneshe halyq qalaýlylary qol qoıǵan.
