Depýtattar zeınetaqy mólsherin ósirip, tabys salyǵyn ulǵaıtý máselesin kóterdi
ASTANA. Qyrkúıektiń 8-i. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda depýtat Gúlmıra Isimbaeva elimizdegi zeınetaqy mólsherin arttyrýǵa qatysty Úkimet basshysyna saýal joldady. Sonymen birge, depýtat Zeınolla Alshymbaev atalǵan máseleni qoldaı kele, tabysqa salynatyn salyq mólsherin arttyrý qajettigin alǵa tartty.
Jıyn barysynda sóz alǵan depýtat Gúlmıra Isimbaeva qoǵam tarapynan kóterilip júrgen problemalarǵa toqtala kele, saılaýshylarmen kezdesýde kóbinese zeınetaqyǵa qatysty birshama ótinishter bolǵanyn jetkizdi. Onyń aıtýynsha, «Nur Otan» partııasynyń qoǵamdyq qabyldaýy barysynda jasy 70-ten asqan bir top zeınetkerler osy máselege qatysty ótinish jasaǵan. Onda ótinish ıeleri zeınetaqy kólemin respýblıkadaǵy ortasha jalaqynyń 75 paıyzyna deıin arttyrýdy surapty. Bundaı usynystar Halyqaralyq eńbek uıymy tarapynan da jasalǵan bolsa kerek.
«Túrli sanattaǵy zeınetkerlerdiń ótinishterine oraı, Úkimet basshysynan bundaı úndeýlerge qulaq asýdy suraımyz. Tıisti organdar qajetti esep-qısabyn jasap, talap etiletin shyǵyndar eseptelse eken», dedi depýtat.
Bul máseleni depýtat Zeınolla Alshymbaev ta qoshtady. «Halyqpen kezdesýde kóbinese zeınetkerler osy jaıtty qozǵady. Biz kelesi jyly zeınetaqyny 10 paıyzǵa ósirmekshimiz. Sonyń ózinde zeınetkerlerdiń alatyn aqshasy tómen. Sondyqtan bul jaǵdaıdy depýtattardyń basym bóligi qoldap, sheshýge yqpal jasaýy tıis. Jalpy, zeınetaqyny kóterýge elimizdiń múmkindigi barshylyq. Onyń ornyna Úkimet kompanııalarǵa salynatyn tabys salyǵyn arttyrsa ıgi. Máselen, Reseımen salystyryp qaraıyq. Bul elde munaıǵa eksporttyq baj salyǵy tonnasyna 280 dollarǵa deıin barady, al Qazaqstanda 20 dollar. Ony 20 paıyzǵa ǵana ósirmekshimiz. Bul qalaı? Jalpy, salyq bazasyn ósiretin múmkindik elimizde kóp. Jaǵdaıymyz keledi. Sondyqtan da, bıýdjetti qabyldaý barysynda buny basa qaperge alsaq», dedi Z. Alshymbaev.
