Depýtattar zań qabyldaǵanda qandaı máselelerge ekpin qoıýy kerek
NUR-SULTAN. QazAqparat – QR Parlamenti Senatynyń Tóraǵasy Darıǵa Nazarbaeva Senat zań qabyldaýǵa qatysty qandaı negizgi máselerdi júzege asyrýy qajet ekenin aıtty, dep habarlaıdy QazAqparat tilshisi.
«Jaqynda Úkimet zań jobalaý jumystarynyń osy jylǵa arnalǵan josparyn bekitti. 2020 jylǵy jospar jobasyna mańyzdy máselelerdi sheshýge, Tuńǵysh Prezıdent–Elbasy Nursultan Ábishuly Nazarbaev pen Memleket basshysynyń tapsyrmalaryn oryndaýǵa baǵyttalǵan 17 zań jobasy engizilgen. Osyǵan baılanysty, komıtetter aldyn ala zań jobasyn ázirleýshilermen zańnamalyq jumystardy úılestirý qajet», - dedi D. Nazarbaeva Senattyń jalpy otyrysynda.
Osy oraıda ol depýtattardan Úkimetke jan-jaqty pysyqtalǵan usynystardy berýdi surady.
«Biz osy zańnamalyq qyzmet pen birge halyqty alańdatatyn ózekti máseleler boıynsha Úkimetke naqty usynystar berip, tıisti zańdarǵa túzetýler engizýimiz kerek. Depýtattyq saýaldardyń tolyq júzege asyrylýy da nazarlaryńyzda bolsyn»,- dedi Senat Tóraǵasy.
Sonymen qatar, ol QR Prezıdenti Qasym-Jomart Toqaev ótken jyldyń qyrqúıek aıynda «Syndarly qoǵamdyq dıalog - Qazaqstannyń turaqtylyǵy men órkendeýiniń negizi» atty Joldaýyn iske asyrýǵa arnalǵan jalpyulttyq is-sharalar josparyn bekitkenin eske saldy.
«Senat zań qabyldaýǵa qatysty myna negizgi máselerdi júzege asyrý qajet, atap aıtqanda:
- quqyq qorǵaý organdarynyń nemese arnaýly memlekettik organdar qyzmetkerleriniń arandatýshylyq áreketteri úshin jaýapkershilikti kúsheıtý arqyly azamattardyń quqyqtaryn qorǵaýdyń kepildikterin arttyrý, sondaı-aq shynaıy dálelderdiń jetkilikti jıyntyǵymen rastalmaǵan málimettermen qylmystyq jaýaptylyqqa tartýǵa, tek kýálik etý negizinde jaýapkershilikke tartý men sottaýǵa tyıym salý;
- ákimshilik ıýstıtsııany engizý, zańnamadaǵy barlyq túsiniksiz qarama-qaıshylyqtardy azamattar men bıznestiń paıdasyna túsindirýdi qamtamasyz etý, olarǵa memlekettik organdarmen ózara qarym-qatynasqa teń jaǵdaı jasaý;
- jergilikti mańyzy bar áleýmettik-ekonomıkalyq mindetterdi sheshýde aýdandyq, qalalyq jáne aýyldyq deńgeıdegi bıliktiń derbestigi men jaýapkershiligin keńeıtý.
«Biz óz tarapymyzdan zań qabyldaý qyzmetine jaýapkershilikpen qarap, der kezinde oryndaýǵa mindettimiz», - dep tolyqtyrdy Senat Tóraǵasy.
