Depýtattar ıadrolyq synaqtardan zardap shekken azamattarǵa memlekettik qoldaý kórsetýdiń zańnamalyq joldaryn jetildire túsýge atsalysýy qajet - J. Káribjanov
ASTANA. Sáýirdiń 19-y. QazAqparat /Qanat Mámetqazyuly/ - Parlament depýtattary ıadrolyq polıgondardaǵy synaqtardan zardap shekken azamattarǵa memlekettik qoldaý kórsetýdiń zańnamalyq joldaryn áli de bolsa jetildire túsýge atsalysýy qajet.
Búgin QR Parlamenti Májilisinde «Qazaqstan - beıbitshilik eli» taqyrybynda ótken dóńgelek ústel barysynda Májilis Tóraǵasynyń orynbasary Jánibek Káribjanov osylaı málim etti, dep habarlaıdy QazAqparat.
«Polıgonnyń ekologııalyq apat aımaǵyna kiretin aýmaqtaǵy turǵyndardyń densaýlyǵyn saqtaý máselesi de halyq qalaýlylarynyń jiti nazarynda bolýy kerek. Bul óńirdegi qorshaǵan ortanyń ekologııalyq jaǵdaıyn jaqsartý barysyna da árdaıym kóńil bólgen lázim», dedi J. Káribjanov.
Sonymen birge, Vıtse-spıker jıyndy qorytyndylaı kele, Qazaqstannyń beıbitshilik súıgish el retinde ataq-abyroıynyń odan ári órleýine jáne Elbasynyń kópshilik kókeıinen shyqqan bilikti bastamalary tóńireginde jumylýǵa shaqyrdy. «Jurtymyz ıadrolyq synaq zardabynan tezirek arylyp, Qazaqstannyń ekologııalyq taza elge aınalýyna barymyzdy salýǵa tıispiz», dedi J. Káribjanov.
