Depýtattar vaktsınatsııadan bas tartatyn halyq sanynyń artýyna alańdaýly
ASTANA. QazAqparat - Parlament Májilisi depýtattarynyń toby elimizde vaktsınatsııaǵa qarsy qozǵalystyń qarqyn alýyn, ıaǵnı halyqtyń josparly aldyn alý ekpelerinen bas tartý deńgeıiniń artýyna alańdaýshylyq bildirdi, dep habarlaıdy QazAqparat.
«2005 jyldan 2015 jyl kezeńinde balalaryna ekpe jasaýdan bas tartqan ata-analar 2 myńnan 8 383-ke deıin artty, ıaǵnı 4 eseden astamǵa joǵarylady. QR Ulttyq ekonomıka mınıstrligi Tutynýshylar quqyqtaryn qorǵaý komıtetiniń málimeti boıynsha, 2016 jyldyń 9 aıynda profılaktıkalyq ekpeden bas tartý boıynsha 8239 fakti tirkeldi. Onyń ishinde basym bóligi 1 jasqa deıingi balalarǵa tıesili (3554 nemese 43 paıyzy), 1-2 jastaǵylar - 21 paıyzdy (1717), 2-5 jas aralyǵyndaǵylar - 27 paıyzdy (2233), 6-15 jastaǵylar - 5,7 paıyzdy, sondaı-aq 16 jastan asqandar 3 paıyzdy qamtyp otyr», - dedi Úkimet basshysynyń atyna depýtattyq saýaldy joldaǵan Quralaı Qaraken.
Onyń sózine qaraǵanda, ekpeden bas tartýdyń basym bóligi Aqtóbe (17,9 paıyz), Ońtústik Qazaqstan (17 paıyz), Mańǵystaý (13 paıyz), Qaraǵandy (9,4 paıyz) oblystarynda jáne Almaty qalasynda (12 paıyz) tirkeldi.
Depýtattyń paıymynsha, búginde vaktsınatsııaǵa qarsy qozǵalystyń belsendi ustanymy densaýlyq saqtaý mamandary kommýnıkatsııasynyń joqtyǵy adamdardyń ekpelerge senimsizdigin týdyrýda. Vaktsınalaý ınfektsııalyq aýrýlardyń taralýyna tosqaýyl qoıýda tıimdi shara bolyp tabylady.
Sóz sońynda Quralaı Qaraken bul máselede Úkimet basshysy Baqytjan Saǵyntaevqa elimiz halqyn josparly profılaktıkalyq ekpemen ońtaıly qamtamasyz etý boıynsha qoldanystaǵy zańnamaǵa sáıkes tıisti sharalar qabyldaýǵa ótinish bildirdi.
