«Depýtattar uıyqtap otyrady» degen qaýesetti taratpaýdyń amaly bar» - respýblıkalyq basylymdarǵa sholý

***

«Egemen Qazaqstan» gazetiniń jazýynsha, Memleket basshysy Nursultan Nazarbaev «KEGOK» AQ prezıdenti Almasadam Sátqalıevti qabyldady. Kezdesý barysyndaA.Sátqalıev Prezıdentke kompanııanyń 2009 jylǵy qyzmetiniń qorytyndylary týraly esepti jáne Qazaqstan tutynýshylaryn qýat kózimen qamtýdyń aǵymdaǵy jaǵdaıy týraly, ulttyq elektr jelisin damytý jónindegi kompanııanyń josparyn usyndy.

Sondaı-aq osy kúni Elbasy Nursultan Nazarbaev Izraıl Prezıdenti Shımon Perespen telefon arqyly sóılesken. «Áńgimelesý barysynda ekijaqty yntymaqtastyqtyń qazirgi ahýaly men damý bolashaǵy talqylandy. Taraptar Izraıl Prezıdentiniń Qazaqstanǵa jasaǵan memlekettik sapary barysynda qol jetkizilgen ýaǵdalastyqtardy, sonyń ishinde joǵary tehnologııalar boıynsha birlesken qor qurýdy iske asyrýdyń mańyzdylyǵyn atap ótti. Qazaqstan men Izraıl Prezıdentteri eki eldiń halyqaralyq jáne óńirlik uıymdardyń, atap aıtqanda, ústimizdegi jylǵy maýsym aıynda kezekti sammıti ótkiziletin AÓSShK aıasyndaǵy árekettestigi máselesin talqylady, dep jazady «Egemen Qazaqstan» gazeti.

Sársenbi kúni Máskeýde Qazaqstan Respýblıkasynyń Premer-Mınıstri Kárim Másimov pen Reseı Federatsııasy Úkimetiniń Tóraǵasy Vladımır Pýtınniń kezdesýi bolyp ótti. Osyǵan oraı «Egemen Qazaqstan» gazetiniń juma kúngi sanynda «Mejeli mindetterdiń oryndalýy oıdaǵydaı» degen taqyryppen shaǵyn maqala basyldy.K.Másimov alǵa qoıylǵan mindetterdi sheshýde aıtarlyqtaı úlken alǵa basýshylyqtarǵa qol jetkizilgendigin atasa, V. Pýtın «Integratsııalyq úderisterde Qazaqstan postkeńestik keńistikte naǵyz kóshbasshy bolyp tabylady jáne Keden odaǵyn qurýda kóp jumystar atqardy», depti óz kezeginde.

Astanada Qazaqstandaǵy Fınlıandııa kúni aıasynda eki eldiń 250-den astam kásipkerleriniń, ulttyq kompanııalar men memlekettik organdar jetekshileriniń qatysýymen bıznes forým ótti. Osy jaıt arqaý bolǵan maqala «Egemen Qazaqstan» gazetinde «Innovatsııa úshin suranysqa ıe el» degen taqyryppen maqala jaryq kórdi. «Búginde elimizdi Sýomı elimen aradaǵy baılanysta saýda-sattyq, ınnovatsııany qoldaý, joǵary tehnologııany ıgerý, munaı jáne gaz ónimderin óndirý, ony saýdalaý máseleleri ja­qyndastyrýda. Keden komıtetiniń málimetterine súıensek, eki eldiń arasyndaǵy saýda aınalymy ótken jyly 705,1 mln. AQSh dollaryn quraǵan. 2008 jyly bul kórsetkish 1 mlrd. dollar bolǵan. Al 2009 jyldyń 9 aıy boıynsha Fınlıandııanyń Qazaqstanǵa ákelgen tikeleı ınvestıtsııasynyń kólemi 21,9 mln. AQSh dollaryna jetken bolsa, byltyrǵy jyldyń qańtar-qyrkúıek aılarynda ol 2,8 mln. dollardy quraǵan. Osy kúnderi elimizde 8 birlesken kásiporyn jáne 100 paıyz fın kapıtalynyń qatysýymen quralǵan 18 kásiporyn jumys isteýde, dep jazady basylym.

«Ekspress-K» basylymynyń búgingi sanynda «QazAqparat» agenttigi Qazaq redaktsııasynyń bas redaktory, jazýshy Jarylqap Beısenbaıulymen aradaǵy suhbat «Erekshe tapsyrmalarǵa arnalǵan fenomen» degen taqyryppen jarııalandy. Aǵymdaǵy jyly 175 jyldyq mereıtoıy ótetin qazaqtyń uly ǵalymy jaıynda áńgime órbitken jazýshy 35 jylǵa sozylǵan izdenisteriniń nátıjesinde «Ǵıbratty ǵumyr» serııasy boıynsha «Shoqan» atty kólemdi kitabyn jaryqqa shyǵarǵan bolatyn.

2009 jyly órt sóndirýshiler úsh myńnan astam qazaqstandyqty ajal tyrnaǵynan qutqaryp qalǵan. Bul týraly «Kazahstanskaıa pravda» gazetine suhbat bergen QR TJM Órtke qarsy qyzmet komıtetiniń tóraǵasy Serik Áýbákirov aıtqan. Sonymen qatar onyń atap ótýinshe, elimizde órtterdiń sany 10 paıyzǵa kemigenimen, olardyń saldary óte aýyr bolǵan. 17184 órtten 558 adam qaza taýyp, 604 azamat zardap shekken. Materıaldyq shyǵyn 5 mıllıard teńgeden asyp túsken.

Keshe Astana qalasynda Fınlıandııanyń Qazaqstandaǵy Tótenshe jáne Ókiletti Elshisi Mıkko Kınýnnen, syrtqy saýda damý mınıstri Paavo Vıaıýrıýnen jáne elimizdiń Indýstrııa jáne saýda mınıstri Áset Isekeshevtiń qatysýymen atalǵan memlekettik qazaqstandaǵy elshiligi resmı ashyldy. Osyǵan oraı «Aıqyn» gazetiniń búgingi sanynda «Yntymaqtastyqtyń jańa salalary paıda boldy» degen taqyryppen maqala shyqty. Basylymnyń jazýynsha, Ortalyq Azııada tuńǵysh ret ashylǵan dıplomatııalyq ókildik Qyrǵyzstan azamattaryna da kómek kórsetpek.

«Aıqyn» gazetiniń dástúrli «Aq sóıle!» aıdarynyń búgingi qonaǵy - ál-Farabı atyndaǵy qazaq ulttyq ýnıversıtetiniń derektaný jáne tarıhnama kafedrasynyń meńgerýshisi, tarıh ǵylymynyń doktory, professor Qambar Atabaev. Basylym tilshsiniń saýaldaryna tuşymdy jaýap bergen ǵalymnyń suhbaty «Qazaqstannyń tarıh ǵylymynyń zertteý nysany - qazaq tarıhy bolýy tıis» degen taqyrypppen jarııalanǵan. Ekeýara áńgime barysynda ol «Qazaqtyń shyqqan tegin zerttemeı, onyń óz tarıhyn zertteý múmkin emes. Sondyqtan da Kereı men Jánibekten beri qaraıǵy kezeńdi ǵana qazaq tarıhy dep bólip qaraý - óte qate túsinik», dep óz pikirin bldiripti. Suhbattyń tolyq nusqasyn oqyǵyńyz kelse, basylymnyń búgingi nómirine nazar salyńyz.

«Aıqyn» gazetiniń jazýynsha, keshe Máskeýde «Naýryz bank Qazaqstan» AQ basqarmasynyń burynǵy tóraǵasy ustalǵan. Bul aqparatty basylym Ekonomıkalyq qylmysqa jáne sybaılas jemqorlyqqa qarsy kúres agenttiginiń baspasóz qyzmetine silteme jasaı otyryp habarlady. Orazaly Erjanov qyzmet babyn asyra paıdalanyp, uıymdasqan top quryp, ony basqarǵan jáne 3,5 mıllıard teńge aqsha urlaǵan, sonymen birge basqa da qylmystar jasaǵan degen aıyptarmen 2005 jyldyń qazan aıynan beri halyqaralyq izdeýde bolatyn.

***

«Kópbalaly analardyń zeınetke shyǵý jasyn 50 jasqa deıin tómendetý qajet pe?». Bul saýal búgin jaryq kórgen «Alash aınasy» gazetiniń dástúrli «Oı-kókpar» aıdarynda «Aq jol» partııasynyń tóraǵasy Álıhan Báımenov pen QR Parlamenti Májilisiniń depýtaty Aldan Smaıylǵa qoıylǵan. Esimi elge tanymal qoǵam qaıratkerleriniń bir-birine qarama-qaıshy jaýaptaryn basylymnyń búgingi sanynan egjeı-tegjeıli oqı alasyzdar.

Memlekettik organdardyń kez kelgen máselege qatysty qabyldaǵan mańyzdy sheshimderimen halyq árkezde qanyq bolyp otyrýy shart ekendigin alǵa tartqan «Alash aınasy» gazeti óziniń kezekti sanynda «Depýtattar uıyqtap otyrady» degen qaýesetti taratpaýdyń amaly bar» degen taqyryppen maqala jarııalady. «Jalpy otyrysta 3-4 saǵat májilis quratyn halyq qalaýlylarynyń jumysyn telearnalardan tikeleı kórsetse, qabyldanǵan sheshimder, tuşymdy pikirler men tosyn usynystardyń barlyǵy ashyq, jarııaly túrde bolar edi», dep jazady basylym. Osyǵan oraı basylym birqatar halyq qalaýlylarynyń pikirlerin de qosa jarııalaǵan. Máselen Májilis depýtaty Baǵıla Baımaǵambetova «depýtattar jınalyp alyp qupııa máseleni talqylamaıtyny belgili ǵoı. Sondyqtan telearnalardan kórsetip turýyna qarsy emespin»,dese, áriptesi Qabıbolla Jaqypov «depýtattardyń jumysyn kórsetý durys qoı. Biraq keıbir zań jobalaryn talqylaý kezinde otyrys 4-5 saǵatqa sozylyp ketetin kezder jıi bolyp turady. Osy ýaqyt boıy telearnadan kórsetý qymbatqa túsip ketedi. Osy jaǵyn da eskerý qajet», degen pikirin jetkizgen.