Depýtattar úıiniń aldynda qyryqqabat ósip jatyr
ASTANA. QazAqparat - Depýtattarǵa arnalǵan «Nursaıa» turǵyn úıi kesheni mańaıynda erekshe gúlzárdy otyrǵyzdy. Ol jerde «dekoratıvti qyryqqabat» atty gúlder ósip jatyr, dep habarlaıdy QazAqparat tilshisi.
«Astana-Zelenstroı» AQ-sy óndiristik jumysqa jaýapty Dıdar Teljanulynyń aıtýynsha, buǵan deıin dekoratıvti qyryqqabat qalanyń birneshe jerinde egilgen. Alaıda osy joly Qonaev pen Túrkistan kósheleriniń qıylysyna otyrǵyzǵannan keıin astanalyqtar erekshe gúzardy birden baıqaǵan. «Iá, ony «dekoratıvti qyryqqabat» deıdi. Biraq ol jeıtin qyryqqabatqa jatpaıdy. Óskennen keıin gúl bolyp ashylady. Ony ózimizdiń jylyjaıymyzda ósiremiz. Negizi, dekoratıvti qyryqqabatty otyrǵyzyp jatqanymyzǵa biraz boldy. Buǵan deıin kórinbeıtin jerge ekkennen keıin kisiler baıqamaǵan da shyǵar. Bıyl «Nursaıanyń» janyna otyrǵyzdyq. Sodan adamdar birden kórgen bolar», - deıdi D.Teljanuly.
Aıta keteıik, bul kádimgideı qyryqqabattyń bir túri bolyp sanalady. Onyń basty ereksheligi sol, basqa gúlder sııaqty kúzge taman solyp qalmaıdy. Qar túskenshe túrli-tústi bolyp qala beredi. Mamandardyń aıtýynsha, ony jeýge de bolady. Sebebi quramynda san alýan dárýmender bar. Kúzde alǵashqy qatqaqtan keıin dekoratıvti qyryqqabattyń qyshqyl dámi ketedi. Sol kezde dámi de jaqsarady.
