Depýtattar úsh aýysymdy mektepter sanynyń azaımaýyna alańdaýly
ASTANA. QazAqparat - Búgin QR Parlamenti palatalarynyń birlesken otyrysynda Májilis depýtaty Gúlnar Ihsanova úsh aýysymdy mektepter sanynyń azaımaı otyrýyna alańdaýshylyq bildirdi, dep habarlaıdy QazAqparat.
Belgili bir kórsetkishtiń jetistikteri ár ýaqytta da sol bir kórsetkishtiń jetistigine dálel bola almaıdy. Máselen, mektepke deıingi tárbıe mamandyǵy boıynsha joǵary jáne kásibı-tehnıkalyq bilimi bar pedagog qyzmetkerdiń úlesi ındıkatorynyń artyǵymen oryndalýy balalardy erte bastan damytý jáne daıyndaý úshin mektepke deıingi sapaly bilim men tárbıemen qamtamasyz etý strategııalyq josparlary maqsattarynyń oryndaýyna jaqyn degendi bildirmeıdi. Shyn máninde mektepke deıingi arnaıy bilim berý salasynda ne bári 37 protsent pedagog bar. Al Mádenıet jáne sport mınıstrliginiń balalar men jasóspirimderdi dene tárbıesi jáne sportpen qamtý úlesiniń 15,1 paıyz ǵana bolýy tań qaldyrady», - dedi Májilis deptýtaty.
Onyń aıtýynsha, úsh aýysymmen bilim beretin mektepter úlesin kórsetetin negizgi ındıkator múldem oryndalmaǵan.
«Eger jyl basynda mundaı 87 mektep jumys istep turǵan jáne úsh aýysymdy mektepterdi joıý úshin 47 bilim oshaǵy salynǵan. Alaıdy jyldyń sońynda anyqtalǵan mundaı mektepterdiń sany 66-ǵa jetip otyr. Jergilikti atqarýshy organdardyń mektepterdegi bala sanynyń artý yqtımaldyǵyn, ıaǵnı demografııalyq ósim men kóshi-qon belsendiligi syndy faktorlardy eskermegendigin kórsetedi. Osy jyldyń ózinde taǵy apatty 24 mektep anyqtaldy. Bul mektepterdi tólqujattaý formaldy túrde júrgiziletindigin jáne tájirıbede múldem qoldanylmaıtyndyǵyn kórsetedi», - G. Ihsanova.
