Depýtattar Túrkistan oblysynda Ońaltý ortalyǵynyń qurylysymen tanysty
ASTANA. KAZINFORM – Májilis depýtattary, «AMANAT» partııasy fraktsııasynyń músheleri Qaırat Balabıev, Nursultan Baıtilesov, Temir Qyryqbaev jáne Ulasbek Sádibekov Túrkistan oblysy Saýran aýdany Orańǵaı eldi mekenine baryp, Múmkindigi shekteýli jandardy ońaltý ortalyǵynyń qurylysymen tanysty. Bul nysan partııanyń saılaýaldy baǵdarlamasy aıasynda salynyp jatyr.
Halyq qalaýlylary qurylys-montaj jumysy aıaqtalýǵa jaqyndaǵan nysannyń qazirgi jaı-kúıine, arnaıy jabdyqtarmen qamtylýyna, ortalyq aýmaǵyna barlyq ınfraqurylymnyń tartylýyna, abattandyrý jumysyn júrgizý máselesine basa nazar aýdardy.
– Turǵyndar «AMANAT» partııasynyń atqaryp jatqan jumysyn naqty nátıjege qarap baǵalaıdy. Sondyqtan partııanyń «Halyqpen birge!» saılaýaldy baǵdarlamasyn júıeli júzege asyrý óte mańyzdy. Turǵyndardyń suranysyna ıe áleýmettik nysandar sapaly salynyp, ýaqtyly paıdalanýǵa berilýge tıis. Osy ortalyqtyń qurylysy da partııanyń erekshebaqylaýynda», – dedi depýtat Temir Qyryqbaev.
Aıta keteıik, nysan qurylysyna oblystyq jáne respýblıkalyq bıýdjetten 2,6 mlrd teńge kóleminde qarajat bólindi. Jańa nysanda bir mezette 200 patsıenttiń em qabyldaýyna jaǵdaı jasalyp, olardy ońaltý sharalarymen qamtý kózdelip otyr. Josparǵa sáıkes, Túrkistan qalasynyń irgesinde salynyp jatqan Ortalyq bıyl qyrkúıekte paıdalanýǵa beriledi.
– Ózderińiz biletindeı, óńirde erekshe qajettiligi bar azamattardyń qatary kóp. Men sondaı turǵynnyń birimin. Qazir Saýran aýdany Qarashyq aýyly Qumtıyn eldi mekeninde turyp jatyrmyn. 2-toptaǵy múgedekpin. Jylyna kemi 2 ret dáriger qabyldaýynda bolyp, ońaltý sharalarynan ótýge májbúrmin. Ondaı medıtsınalyq mekeme jaqyn jerde bolmaǵandyqtan, em qabyldaý úshin birneshe jyldan beri Shymkent qalasyna qatynap júrmin. Jańa nysan tezirek iske qosylsa deımin. Osy ortalyqtyń ashylýyn asyǵa kútip júrmin, – dedi Jaqsykúl Istamkýlova.
Aıta keteıik, depýtattardyń óńirge sapary ári qaraı jalǵasady. Halyq qalaýlylary taǵy birqatar nysandardy aralap, halyqpen kezdesýler ótkizedi.
