Depýtattar Túrkistan oblysynyń Ordabasy aýdanynda temirjol qurylysyn erterek bastaýdy surady
ASTANA. QazAqparat - Túrkistan oblysy Ordabasy aýdanynda kireberis temirjoldardy salýǵa jospar boıynsha qarajat 2020 jyly bóline bastaıdy. Alaıda bir top senator bul qarjyny Úkimet basshysynan bıyl bólýdi surap otyr, dep habarlaıdy QazAqparat tilshisi.
Asqar Beısenbaev, Álı Bektaev, Muratbaı Joldasbaev, Álimjan Qurtaev pen Edil Mamytbekov qatarly halyq qalaýlylary juma, 31 qańtar kúni ótken Senattyń jalpy otyrysynda Premer-Mınıstrdiń atyna depýtattyq saýal joldady. Oǵan zer salsaq, temirjol qurylysyn erterek bastaý munaı-hımııa salasyndaǵy iri kásiporyndy iske qosý úshin qajet.
«Shymkent qalasynyń respýblıkalyq mańyzy bar mártebe alýyna baılanysty, Túrkistan oblysy bıýdjetiniń kiris bólimi tómendeıtini belgili. Elbasynyń tapsyrmasyna sáıkes, oblystyń bıýdjet kirisi men ósimin ulǵaıtý, kásipkerlerdi barynsha qoldaý - óńirdi damytýdyń negizgi maqsattarynyń qataryna jatady. Bul oraıda, «Bıznestiń jol kartasy 2020» baǵdarlamasyn iske asyrý, onyń ishinde kásipkerlerdi qajetti ınfraqurylymmen qamtamasyz etý mańyzdy. Osy maqsatta «2019 - 2021 jyldarǵa arnalǵan respýblıkalyq bıýdjet týraly» QR Zańyn iske asyrý» týraly Úkimet qaýlysyna sáıkes, Túrkistan oblysy Ordabasy aýdanynda «Standart petroleum $ CO» JShS-niń kireberis temirjoldaryn salý úshin respýblıkalyq bıýdjet esebinen 2020 - 2021 jyldarǵa 940 mıllıon teńge qarastyrylǵan», - deıdi senator Asqar Beısenbaev.
Onyń aıtýynsha, «Standart petroleum $ CO» kásipornynyń ınvestıtsııalyq quny 120 mlrd teńge, qýattylyǵy jylyna 2,0 mln tonna munaı-hımııa ónimi bolyp otyr. Sonymen qatar, joba 522 jańa jumys ornyn ashýǵa múmkindik beredi.
«Jobany iske qosý jumys oryndarynyń paıda bolýymen qatar, salyq túsimderiniń kólemin de ulǵaıtady. Nátıjesinde, oblystyń qarjylyq turaqtylyǵy kúsheıedi. Bul jobanyń Túrkistan oblysymen qatar, memleketimiz úshin de mańyzy zor ekendigin atap ótý qajet. Atalǵan jobany iske qosý 2020 jyldyń І toqsanyna josparlanǵan. Alaıda, kireberis temir joldarsyz bul joba jumys istemeıtini belgili. Jobanyń ýaqtyly iske qosylýy atalǵan temir joldardyń erterek salynýyna tikeleı baılanysty», - deıdi depýtat.
Senatorlar osy sebepti Ordabasy aýdanynda temirjol salý úshin respýblıkalyq bıýdjet tarapynan 2020 - 2021 jyldarǵa qarastyrylǵan qarajatty 2019 jyly bólýdi qarastyrýdy surady.
