Depýtattar turǵyn úıge muqtaj Uly Otan soǵysynyń múgedekteri men qatysýshylaryn turǵyn úımen qamtamasyz etý máselesin kóterýde

ASTANA. Sáýirdiń 19-y. QazAqparat - Májilis depýtattary Vladımır Bobrov, Vladımır Nehoroshev jáne Amanǵos Ótegenov «Turǵyn úı qatynastary týraly» elimizdiń qoldanystaǵy zańyna túzetýler engizýdi kózdeıtin zań jobasyn ázirlep, Palatanyń qaraýyna usyndy,

dep habarlaıdy QazAqparat.

Bastamashylardyń málimdeýinshe, atalǵan zań jobasy Uly Otan soǵysynyń múgedekteri men qatysýshylaryna memlekettik turǵyn úı qorynan turǵyn úı nemese jeke turǵyn úı qorynan jergilikti atqarýshy organ jaldaǵan turǵyn úı alý quqyǵyn birinshi kezekte bergen kezde olardyń tabysynan shekteýlerdi alyp tastaý arqyly atalǵan sanattaǵy adamdarǵa memlekettik qoldaý kórsetýdi kúsheıtý maqsatynda ázirlengen.

Qazirgi ýaqytta «Turǵyn úı qatynastary týraly» Qazaqstan Respýblıkasynyń Zańyna sáıkes Uly Otan soǵysynyń múgedekteri men qatysýshylary, sondaı-aq olarǵa teńestirilgen adamdar halyqtyń áleýmettik jaǵynan qorǵalatyn toptaryna jatady jáne turǵyn úıge muqtaj basqa adamdarmen qatar memlekettik turǵyn úı qorynan turǵyn úı nemese jeke turǵyn úı qorynan jergilikti atqarýshy organ jaldaǵan turǵyn úı alýǵa teńdeı quqyqtary bar. Oblys, Astana men Almaty qalalary ákimshilikteriniń derekteri boıynsha, kezekte turǵan Uly Otan soǵysynyń múgedekteri men qatysýshylary, sondaı-aq olarǵa teńestirilgenderdiń sany 5 myń 651 adamdy quraıdy.

Osyǵan baılanysty depýtattar bastamashy bolǵan zań jobasynda Uly Jeńistiń 65 jyldyǵyn merekeleý qurmetine Uly Otan soǵysynyń múgedekteri men qatysýshylaryna memlekettik turǵyn úı qorynan alǵan turǵyn úılerin jeke menshikke óteýsiz berý quqyǵyn, sondaı-aq olar boıynsha turǵyn úıge muqtajdardyń jeke tizimin júrgizý arqyly memlekettik turǵyn úı qorynan turǵyn úı alýǵa basym quqyq berý usynylady.

Sonymen qatar elimizdiń zańnamalyq aktilerinde azamattardy apattyq úılerden memlekettik turǵyn úı qory bolyp tabylatyn, jergilikti atqarýshy organdar salǵan turǵyn úılerge kóshirýge qatysty quqyqtyq olqylyqtar bar. Sondyqtan zań jobasynda apattyq jaǵdaıdaǵy jeke úılerden kóshirilgen azamattardyń turǵyn úı máselesin sheshý kezeńinde olarǵa memlekettik turǵyn úıden berilgen turǵyn úıdiń quqyqtyq mártebesin aıqyndaý jáne apattyq jaǵdaıdaǵy úıleri bar jáne sondaı úılerde turatyn azamattardyń jeke tizimin bekitý normalary usynylǵan.

Zań jobasynda usynylyp otyrǵan ózgerister men tolyqtyrýlar turǵyn úıge muqtaj Uly Otan soǵysynyń múgedekteri men qatysýshylaryn ýaqytynda turǵyn úımen qamatasyz etýge, sondaı-aq turǵyn úıler normatıvtik-tehnıkalyq qujattarǵa sáıkes apattyq jaǵdaıda dep tanylǵan azamattarǵa turǵyn úı bólý máselesin sheshýge yqpal etpek.