Depýtattar Torǵaı óńirin damytýdyń arnaıy baǵdarlamasyn qabyldaýdy usyndy

ASTANA. QazAqparat - Senator Álı Bektaev elimizdiń Premer-Mınıstri Álıhan Smaıylovtyń atyna joldaǵan depýtattyq saýalynda Torǵaı óńirin damytýdaǵy ózekti máselelerdi jarııa etti. Onda kólik qatynasynyń nasharlyǵy, ınjenerlik kommýnıkatsııanyń ábden tozýy, medıtsınalyq mekemelerge dárigerlerdiń jetispeıtini jáne basqa máseleler aıtyldy, dep habarlaıdy QazAqparat tilshisi.

Depýtat senatorlardyń Qostanaı oblysyndaǵy Amangeldi jáne Jangeldi aýdandary men Arqalyq qalasyna sapary kezinde azamattar aıtqan ótinishter osy saýalǵa sebep bolǵanyn atap ótti.

Áýe qatynasynyń joqtyǵy, Arqalyq qalasyna deıin ǵana aparatyn temirjoldyń tozýy men eski vagondar jáne avtomobıl joldarynyń nashar jaǵdaıy óńir ekonomıkasynyń damýyna teris áser etetin basty máseleler bolyp otyr. Senator «Astana-Arqalyq-Torǵaı-Yrǵyz-Shalqar» avtojolynyń qurylysyn jedeldetýdi usynyp otyr. Bul óńir ekonomıkasynyń damýyna serpin beredi jáne kórshi aımaqtarmen ózara is-qımyldy óristetýge múmkindik beredi. Senator sonymen qatar óńirdi aýyz sýmen jáne jylýmen qamtamasyz etý deńgeıiniń tómendigin de atap ótti.

«Búgingi tańda sý qubyrynyń tozýy 86,5%, jylý qubyry 87%, elektr jelisi boıynsha 92%, káriz qubyrynyń tozý deńgeıi 92,8%-dy qurady. Bir sózben aıtqanda, ınjenerlik-kommýnıkatsııalyq júıede tótenshe jaǵdaıdyń joǵary deńgeıi qalyptasqan. Sondyqtan Arqalyq qalasy men Amangeldi, Jangeldi aýdandaryndaǵy ınfraqurylym júıesiniń naqty jaǵdaıyn anyqtaý úshin Úkimetten arnaıy komıssııa shyǵartý qajet», - delingen depýtattyq saýalda.

Sonymen qatar depýtat óńir turǵyndarynyń uıaly baılanys pen ınternetke qol jetkize almaı otyrǵany, óńirdi tabıǵı gazben qamtamasyz etýdiń ekonomıkalyq jáne áleýmettik mańyzy, Arqalyq polıtehnıkalyq kolledjiniń eskirgen ǵımaraty týraly da aıtty.

«Joǵaryda aıtylǵan problemalardy sheshý úshin Qostanaı oblysynyń Torǵaı óńirin serpindi damytý maqsatynda arnaıy óńirlik baǵdarlama qabyldanyp, qajetti kólemde qarjy bólinip, Úkimet deńgeıinde qoldaý kórsetilýi tıis dep esepteımiz», - dedi senator.