Depýtattar teatrlarǵa aqyly qyzmet kórsetýge múmkindik berýdi usynýda
ASTANA. QazAqparat - M.Áýezov atyndaǵy Qazaq memlekettik akademııalyq drama teatryna Ulttyq qazynalyq kásiporyn mártebesine berý qajet. Bul jaıynda QR Parlamenti Senatynyń depýtaty Nurlan Qylyshbaevtyń áriptesteri atynan el Premer-Mınıstri Baqytjan Saǵyntaevqa joldaǵan depýtattyq saýalynda aıtylǵan, dep habarlaıdy QazAqparat.
«Qurmetti Baqytjan Ábdiruly! Bizdiń depýtattyq saýal joldaýymyzǵa 11 naýryzda ótken «Qazaqstan Respýblıkasynyń keıbir zańnamalyq aktilerine mádenıet máseleleri boıynsha ózgerister men tolyqtyrýlar engizý týraly» zań jobasyn talqylaý aıasynda Qazaqstan Respýblıkasy Mádenıet jáne sport mınıstrliginiń basshylyǵymen jáne teatr ujymdarymen kezdesý kezinde teatr dırektorlary, kórkemdik jetekshileriniń teatrlardyń búgingi kúngi jaı-kúıi boıynsha kótergen ózekti máseleleri sebep bolyp otyr. Qazaqstandaǵy barlyq teatrlardyń máselesi ortaq. Olardyń bastylary jańa shyǵarmalardyń azdyǵy, teatrǵa kórermen tartý jaıy, ártisterge beriletin jalaqynyń mardymsyzdyǵy, rejısserlerdiń jetispeýshiligi sııaqty ózekti máseleler», - dedi ol.
Onyń aıtýynsha, Astana qalasyndaǵy Q.Qýanyshbaev atyndaǵy Memlekettik akademııalyq qazaq mýzykalyq drama jáne M.Gorkıı atyndaǵy Memlekettik akademııalyq orys drama teatrlaryna jańa ǵımarat salynyp, olarǵa respýblıkalyq qazynalyq kásiporyn mártebesin berý kerek.
«Ekinshiden, Almaty qalasyndaǵy M.Áýezov atyndaǵy Qazaq memlekettik akademııalyq drama teatryna Ulttyq qazynalyq kásiporyn mártebesine berý qajet. Úshinshiden, teatrlarǵa bıýdjetten beriletin sýbsıdııa mólsherin saqtaı otyryp aqyly túrde qyzmet kórsetýge múmkindik berý kerek. Tórtinshiden, KSRO halyq ártisterine Qazaqstannyń eńbek sińirgen qaıratkerlerine usynylatyn jeńildikterdi berýdi qarastyrý qajet», - dedi Qylyshbaev.
