Depýtattar suıytylǵan gaz baǵasyn retteıtin zań jobasyn qarady

ASTANA. QazAqparat - Parlament Senatynyń jalpy otyrysynda palata depýtattary «QR keıbir zańnamalyq aktilerine gaz jáne gazben jabdyqtaý máseleleri boıynsha ózgerister men tolyqtyrýlar engizý týraly» zań jobasyn eki oqylymda qabyldandy, dep habarlaıdy QazAqparat tilshisi.

«Zań jobasyna bastamashylyq jasaýǵa Qazaqstan Respýblıkasyndaǵy suıytylǵan munaı-gaz naryǵyndaǵy ahýal sebep bolyp otyr. Qoldanystaǵy zańǵa sáıkes, suıytylǵan gazdyń bekitilgen shekti kóterme saýda baǵasy búgingi kúni qosymsha qun salyǵyn esepke almaǵanda 38 701 teńgeni quraıdy. Mundaı baǵa eksporttyq ǵana emes, kórshiles elderdegi kóterme baǵadan da edáýir tómen. Bul gazdy Qazaqstan aýmaǵynan basqa elderge zańsyz eksporttaýǵa ıtermeleıtini sózsiz», - dedi zań jobasyn tanystyrǵan májilismen Baqtyqoja Іzmuhambetov.

Onyń aıtýynsha, Qazaqstanda suıytylǵan gazdyń bólshek saýdadaǵy baǵasy kóterme saýdadaǵy baǵadan edáýir joǵary, tipti kórshi elderdegi bólshek saýda baǵasynan az ǵana tómen. Osylaısha, búgingi kúni elimizdegi zaýyttar gazdy ishki naryqqa ótkizgen kezde shyǵynǵa ushyraýda.

«Tek 2017 jyly suıytylǵan munaı-gaz óndiretin zaýyttar men óndiristerdiń ala almaǵan kirisiniń kólemi 48 mlrd teńgeden astam somany qurady. Cońǵy 4 jylda  suıytylǵan munaı-gazyna suranys eki ese ósti. Ótken jyly ishki naryqqa berilgen suıytylǵan munaı-gazynyń kólemi 900 myń tonnadaı boldy, osy suıytylǵan gazdyń 545 myń tonnasy avtomobıldik gaz quıý stansalaryna berildi. Al bıyl ishki naryqqa beriletin 1 mln 300 myń tonna suıytylǵan munaı-gazynyń 850 myń tonnasy avtomobıldik gaz quıý stansalaryna baǵyttalmaq. Osy suranys qarqynyna qaraǵanda, 2019 jyldyń ózinde suıytylǵan munaı-gazyna tapshylyq paıda bolǵaly otyr», - dedi depýtat.

Osy oraıda ol tapshylyqqa jol bermeý aıasynda gaz óndiretin zaýyttardyń kiristik rejimde jumys isteýi úshin shekti kóterme baǵany tikeleı kóterýge bolmaıtyny atap ótti. Ondaı jaǵdaıda bólshek baǵa birden sharyqtap ósetini sózsiz.

«Zań jobasynyń maqsaty - suıytylǵan gazdyń shyǵarý kólemin arttyrý, óndirýshilerdiń qyzyǵýshylyǵyn týdyrý arqyly suıytylǵan munaı-gaz tapshylyǵyn boldyrmaý. Ol úshin suıytylǵan munaı-gazdy óndiretin  zaýyttarǵa gazdy deldaldarsyz tikeleı satý qaralyp otyr. Zań jobasynda elektrondyq saýda alańyn engizý eskerilgen. Ázirlegen túzetýler bul tetikterdi 2019 jyldan bastap, 2021 jylǵa deıin kezeń-kezeńmen ótkizýdi kózdeıdi», - dedi Іzmuhambetov.

Zań jobasy arqyly belgili bolyp otyrǵandaı, birinshi kezeńde ishki naryqqa beriletin suıytylǵan gazdyń 20 paıyzǵa deıingi kólemi elektrondyq saýda arqyly satylady. Odan keıin  úlesti kezeń-kezeńmen  arttyrý usynylýda.